Tofiq Hacıyev (siyasətçi)

Bu məqalədəki məlumatların yoxlanıla bilməsi üçün əlavə mənbələrə ehtiyac var. Lütfən, məqaləyə etibarlı mənbələr əlavə edərək onu təkmilləşdirməyə kömək edin. Mənbəsiz məzmun problemlər yarada və silinə bilər. Problemlər həll edilməmiş şablonu məqalədən çıxarmayın. Daha ətraflı məlumat və ya məqalədəki problemlərlə bağlı müzakirə aparmaq üçün məqalənin müzakirə səhifəsinə diqqət yetirə bilərsiniz.

Hacıyev Tofiq Məhəmməd oğlu — Gürcüstanın dövlət və ictimai-siyasi xadimi, təhsil işçisi, fizik, Gürcüstan Müsəlman və Xristian Demokratlar İttifaqı Siyasi Partiyasının yaradıcılarından biri və Marneuli rayon şöbəsinin sədri.

Tofiq Hacıyev
Tofiq Məhəmməd oğlu Hacıyev
Doğum tarixi	14 dekabr 1946 (77 yaş)
Doğum yeri	Sarvan, Marneuli, Gürcüstan SSR, SSRİ
Vətəndaşlığı	SSRİ Gürcüstan
Atası	Məhəmməd Hacı oğlu Hacıyev
Anası	Mileyla Söyün qızı Yaqubova
İxtisası	fizik
Təhsili	Azərbaycan Dövlət Universiteti
Fəaliyyəti	siyasətçi

Tofiq Hacıyev 14 dekabr 1946-cı ildə Gürcüstan SSR-in Marneuli şəhərində Nayvəlilər ocağında anadan olub. Borçalının öndər şəxsiyyəti Nayvəlinin nəticəsi, filosof alim Cümşüd Hacıyevin, filoloq alim Abbas Hacıyevin, filoloq alim Vəkil Hacılının (siyasətçi)in qardaşı, filoloq Asif Hacıyevin əmisidir.

Tofiq Hacıyev 1954–1964-cü illərdə Marneuli şəhər 1 saylı orta məktəbində təhsil alıb. 1969-cu ildə Bakı Dövlət Universitetinin fizika fakultəsini bitirib.

Artıq tələbəlik illərində ciddi elmi tədqiqatla məşğul olmuşdur, görkəmli alim, AMEA-nın müxbir üzvü, professor Abdulla Muxtarovun rəhbərliyi ilə hazırladığı "Qalliy2 selen tellur və onun fotoelektrik xassələri" mövzusunda diplom işi elmi rəhbəri və mütəxəssislər tərəfindən dünyada ilk dəfə tədqiq olunmuş elmi problem kimi qiymətləndirilmişdir.

BDU Fizika fakültəsi Elmi Şurasının qərarı ilə aspiranturada saxlanması barədə qərar verilmişdir.

Tələbəlik dövründə elmi fəaliyyətlə yanaşı, idmanla da məşğul olmuş, Neftçi Bakı klubunun əvəzedici heyətində məşqlər keçmiş və Moskvanın "Torpedo" komandasına qarşı "Neftçi"nin əvəzedici heyətinin tərkibində oyunda iştirak etmişdir.

Universiteti bitirdikdən sonra könüllü olaraq yarım ilə qədər Azərbaycan Milli Elmlər Akademiyasının Şamaxı Astrofizika Rəsədxanasında dolunun əmələ gəlməsi və onun qarşısının alınması mövzusunda tədqiqatlar aparmış və nəticələri Azərbaycan hidrometeoroloji mərkəzinə təqdim etmişdir.

1970-ci ilin iyun ayında hərbi xidmətə çağırılmış, SSRİ Silahlı Qüvvələrində zabit kimi xidmət etmişdir. Hərbi xidməti Naxçıvanda Şahtaxtıda keçmişdir. Rota komandiri, batalyonun qərargah rəisi olmuş və kapitan rütbəsində tərxis edilmişdir. Hərbi xidmət dövründə diviziyanın futbol komandasının oyunçu-məşqçisi olmuş, tapançadan atəş və üzgüçülük üzrə 1-ci idman dərəcəsi almışdır. Hərbi xidmətdən sonra Gürcüstana, Marneuliyə qayıtmışdır.

1972–1978-ci illərdə Marneuli 1 saylı rus orta məktəbində müəllim və tədris hissə müdiri, 1978–1983-cü illərdə Marneuli rayon Maarif şöbəsində məktəblər üzrə inspektor işləmişdir.

1983-cü ilin aprel-avqust aylarında Gürcüstan KP Marneuli rayon partiya komitəsinin ideoloji şöbəsində təlimatçı, 1983-cü ilin avqust ayından 1990-cı ilə qədər ideoloji şöbənin müdiri işləmişdir.

1984–1987-ci illərdə Bakı Ali Partiya Məktəbində təhsil almış, ali siyasi təhsillə yanaşı, tarix və ictimaiyyətşünaslıq müəllimi ixtisasına yiyələnmişdir.

1990–1996-cı illərdə Marneuli 4 saylı rus orta məktəbinin direktoru, 1996–1998-ci illərdə rayon Maarif Şöbəsinin müdiri, 1998–2002-ci illərdə rayon bələdiyyəsinin deputatı, 2002–2004-cü illərdə rayon Korrupsiyaya Qarşı Mübarizə Şurasının məsul katibi olmuşdur.

2004–2006-cı illərdə Marneuli Rayon İcra Hakimiyyəti sədrinin 1-ci müavini vəzifəsində işləyib.

1996-cı ildən Gürcüstanın müxtəlif ali məktəblərində ümumi fizika, biofizika və tibbi fizika fənlərindən mühazirələr oxuyur. Gürcüstanın Azərbaycan məktəblərinin tədris-metodik və kadr təminatında xidmətləri var. Bu məktəblərdə çalışan fizika müəllimləri üçün təşkil etdiyi elmi-metodik kursların böyük rolu olmuşdur.

Gürcüstanda azərbaycanlı əhalinin mədəniyyət və təhsilinin inkişafı, vətəndaş həmrəyliyi və demokratik islahatlar uğrunda fəaliyyət aparır.

Gürcüstanda fəaliyyət göstərən və parlament seçkilərində iştirak etmiş, respublika parlamentində və yerli bələdiyyələrdə deputatlarla təmsil olunmuş, yerli azərbaycanlı əhalinin siyasi inkişafında və fəallığında, cəmiyyətə inteqrasiyasında rol oynamış Gürcüstan Müsəlman və Xristian Demokratlar İttifaqı Siyasi Partiyasının yaradıcılarından biri və Marneuli rayon şöbəsinin sədridir.

2006-cı ildən 2017-ci ilə qədər Marneuli rayonu Bələdiyyəsi Maarif Şöbəsinin müdiri işləyib, hazırda Tbilisidə pedaqoji fəaliyyətlə məşğuldur.

İki övladı, dörd nəvəsi var.

• Nayvəlilər (Hacıyevlər)