Toson Şimazaki

Toson Şimazaki (島崎 藤村, Şimazaki Toson^?, 25 mart 1872^[1], Maqome-cuku^[d], Gifu prefekturası – 22 avqust 1943^[1][2], Oiso^[d][3]) və ya doğum adı ilə Haruki Şimazaki – Yaponiya yazıçısı. Yapon naturalizminin əsas müdafiəçilərindən biri olmuşdur.

Toson Şimazaki
yap. 島崎藤村
Doğum adı	島崎 春樹
Doğum tarixi	25 mart 1872(1872-03-25)[1]
Doğum yeri	Maqome-cuku[d], Nakatsuqava[d], Gifu prefekturası, Yaponiya
Vəfat tarixi	22 avqust 1943(1943-08-22)[1][2] (71 yaşında)
Vəfat yeri	Oiso[d][3]
Vəfat səbəbi	beyin qansızması[d]
Dəfn yeri	Oiso[d]
Uşaqları	Keyci Şimazaki[d], Osuke Şimazaki[d]
Atası	Masaki Şimazaki[d]
Təhsili	Meyci Qakuin[d], Taymey ibtidai məktəbi[d], Meyci Qakuin liseyi[d], Kaysey Akademiyası[d]
Fəaliyyəti	şair, roman yazıçısı, yazıçı, söz yazıçısı[d]
Fəaliyyət illəri	1897–1943
Əsərlərinin dili	yapon dili
İstiqamət	naturalizm
Tanınmış əsərləri	Pozulmuş əmr[d], Bahar[d], Ailə[d], Yeni həyat[d], Şəfəqdən öncə[d]
Üzvlüyü	Yaponiya PEN Klubu[d], Yaponiya İncəsənət Akademiyası[d], Nihon Bunqaku Hokokukay[d]
Toson Şimazaki Vikimənbədə
Vikianbarda əlaqəli mediafayllar

1872-ci ildə Naqano prefekturasının Maqome şəhərində doğulmuşdur. Doğum adı Harukidir. Yaponiya klassiklərinin tədqiqatçısı olmuş Masaki Şimazakinin dördüncü oğlu idi.^[4] Şimazaki ailəsi fermer sinfinə mənsub olsa da, regionun aparıcı ailələrindən biri olmuşdur.^[5]

1881-ci ildə təhsil almaq məqsədilə Tokioya köçmüşdür. 1887-ci ildə Meyci Qakuin məktəbinə daxil olmuş, 1891-ci ildə məzun olmuşdur. 1893-cü ildə "Bungakukai" ədəbi jurnalını təsis edən şəxslərdən biri olmuşdur. 1896-cı ildə müəllim kimi işləmək üçün Tokiodan Sendaya köçmüşdür.^[5] Bir il Tohoku Qakuin məktəbində dərs demişdir.^[4] 1897-ci ildə "Gənc bitkilər kolleksiyası" adlı ilk şeir kolleksiyasını nəşr etmişdir. Romantik üslubda yazılmış bu şeir kolleksiyası gənc oxucular tərəfindən bəyənilmişdir.^[5] 1899-cu ildə Naqano prefekturasının Komoro şəhərinə köçmüş və Komoro Qicuku məktəbinin müəllimi olmuşdur. 1900-cü ildə növbəti şeir kolleksiyası nəşr olunmuşdur. ^[4]

Tokioya qayıtdıqdan sonra roman yazmağa qərar vermişdir. "Sulu boya rəssamı" onun ilk roman işi olmuşdur.^[4] 1906-cı ildə "Pozulmuş əmr" adlı əsas romanı nəşr olunmuşdur. Yaponiya ədəbiyyatının ilk naturalist romanı hesab olunan bu romanın baş qəhrəmanı burakumin olduğunu gizlətməyə çalışan məktəb müəllimidir.^[5]

Toson növbəti illərdə avtobioqrafik romanlar yazmağa üslünlük vermişdir. 1908-ci ildə yazdığı ikinci romanı "Bahar" onun gənclik illərindən bəhs edir. 1910–1911-ci illərdə yazdığı "Ailə" romanı yapon naturalizminin klassik əsərlərindən biri hesab olunur. Roman yazıçının qohumluq əlaqələri olduğu iki ailənin zəifləməsindən bəhs edir. Toson 1929–1935-ci illərdə yazdığı əsas tarixi romanı olan "Şəfəqdən öncə" romanında Meyci islahatını atasının prespektivindən təsvir etmişdir.^[5]

Toson 1935-ci ildə yaradılmış Yaponiya PEN Klubunun ilk prezidenti olmuşdur.^[6] Gi de Mopassanın hekayələrini yapon dilinə tərcümə etmişdir.^[7]

Tosonun doğulduğu ev bərpa olunaraq 1952-ci ildə Toson Memorial Muzeyi kimi açılmışdır.^[8]

• The Japan Biographical Encyclopedia & Who's Who (ingiliscə) (II). Tokio: Rengo Press. 1961. səh. 1398-1399. İstifadə tarixi: 5 may 2024.

• Əsərlərinin elektron versiyası