сущ.; -или, -иле; -илер, -илери, -илера шад тир гьал. Жуван шадвал багъишда на виридаз, Гъам - анжах заз къалурда. А. С. КьепӀинал хьиз... Шадвални вахт акун патал зи вилериз хъсан килиг... З. Р. Яр. Зи къаршидал алай кравутдал къатканвай, чинал халис дагъвидиз хас кӀалубдин нер алай, пӀузарар мичӀи вили рангунин тавдиз атанвай, четиндаказ нефес къачузвай азарлудан чина жизви шадвилин хъвер гьатна. А. Эсетов. Шаирдин тарсар. Жегьил перишан тирла, хуьрени зарафат, шадвал тӀимил жезвай. М. В. Гьарасатдин майдандал. Синонимар: къумбарвал, кӀубанвал, хвашивал. Антонимар: пашманвал, пелешвал, перишанвал, сугьулвал, туькьуьлвал, туьруькьуьмвал.
* шадвал авун гл. хвешивал авун. Ихьтин шадвал ийидайдаз Таза къелем мубарак хьуй. Е. Э. КӀани ярдиз. \[Мердан\] - Къурбан, къала кван а хкунихъ галай чуьнгуьр зав гице, са тӀимил шадвал ийин чна. Гь. Гь. Адетдин къармахра, Шадвилер ийизвайбур, кьуьлер авунал машгъулбур, свас тухуз гьазур хьанвайбур юрта гьатнавай. И. В. Чирхчир. Магъамедсалегьа шадвал ийизвай. А. А. Лезгияр. Синонимар: къумбарвал авун, кӀубанвал авун, хвешивал авун, шадвалун. Антонимар: пашманвал авун, пелешвал авун, перишанвал авун, туькьуьлвал авун.