Fikrət Hüseyn oğlu Yusifov (20 avqust 1957, Danzik, Noraşen rayonu) — azərbaycanlı iqtisadçı, iqtisad elmləri doktoru, professor, Azərbaycan Respublikasının maliyyə naziri (1994-1999), Ana Vətən Partiyası sədrinin sosial-iqtisadi məsələlər üzrə müavini (2019-2020), "Ekonomiks" Beynəlxalq İqtisadi Araşdırmalar İctimai Birliyinin sədri.
Fikrət Yusifov | |
---|---|
28 iyun 1994 – 11 iyul 1999 | |
Prezident | Heydər Əliyev |
Əvvəlki | Saleh Məmmədov |
Sonrakı | Əvəz Ələkbərov |
26 oktyabr 1992[1] – 28 iyun 1994[2] | |
Nazir | Saleh Məmmədov |
Əvvəlki | Tofiq Hüseynov |
Sonrakı | Səfər Hüseynov |
Şəxsi məlumatlar | |
Doğum tarixi | 20 avqust 1957 (66 yaş) |
Doğum yeri | |
Partiya |
|
Təhsili |
Fikrət Yusifov 1957-ci ilin avqust ayının 20-də Naxçıvan MR-in Şərur rayonunun Danzik kəndində ziyalı ailəsində anadan olmuşdur. 1974-cü ildə Abşeron rayonunun Mehdiabad qəsəbəsində orta məktəbi bitirmiş və həmin ildə də Dadaş Bünyadzadə adına Azərbaycan Xalq Təsərrüfatı İnstitutuna daxil olmuşdur. 1978-ci ildə İnstitutu fərqlənmə diplomu ilə bitirib təyinatla Azərbaycan SSR Dövlət Bankına işləməyə göndərilmişdir.
1978–1980-ci illərdə hərbi xidmətdə olmuş, sonra əmək fəaliyyətini Azərbaycan SSR Maliyyə Nazirliyində davam etdirmişdir. Nazirliyin büdcə idarəsində baş iqtisadçı, sonra isə şöbə müdiri vəzifəsində çalışmışdır.
Ailəlidir, dörd övladı vardır.
Nazirlikdə işlədiyi müddətdə təhsilini qiyabi aspirantura şöbəsində davam etdirərək 1987-ci ildə Moskva şəhərində "Müasir şəraitdə yerli büdcələrin mədaxil bazarlarının təkmilləşdirilməsi" mövzusunda namizədlik dissertasiyasını müvəffəqiyyətlə müdafiə edərək iqtisad elmləri namizədi alimlik dərəcəsi almışdır. Dissertasiya müdafiəsindən sonra Azərbaycan Dövlət İqtisad Universitetində müəllimlik fəaliyyətinə başlamış, institutun elmi-tədqiqat laboratoriyasına rəhbərlik etmişdirz
2001-ci ildə Rusiyanın Sankt-Peterburq Maliyyə-İqtisad Universitetində doktorluq dissertasiyası müdafiə etmişdir. 2004–2013-cü illərdə Rusiyanın Sankt-Peterburq Dövlət Maliyyə-İqtisad Universitetinin maliyyə kafedrasının professoru olmuşdur. 2018–2020-ci illərdə Azərbaycan Dövlət İqtisad Universitetində professor kimi dərs demişdir.
Altmışdan artıq elmi əsərin və dərsliklərin müəllifidir.
1992-ci ilin oktyabr ayına kimi institutun "Maliyyə-iqtisad" fakültəsinin dekan müavini vəzifəsində işləmişdir. 1992-ci ilin oktyabr ayında Azərbaycan Respublikası maliyyə nazirinin birinci müavini vəzifəsinə təyin edilmiş, 1994-cü ildən 1999-cu ilin iyul ayına kimi Azərbaycan Respublikası maliyyə naziri vəzifəsində işləmişdir.[3]
2014-cü ildə Azərbaycanda "Ekonomiks" Beynəlxalq İqtisadi Araşdırmalar Birliyini təsis etmiş və onun sədri seçilmişdir.
Fikrət Yusifov 28 noyabr 2019-cu ildə Ana Vətən Partiyasına üzv olmuş və sədrin sosial-iqtisadi məsələlər üzrə müavini vəzifəsinə təyin olunmuşdur.[4][5][6][7] Fikrət Yusifov 41 saylı Sumqayıt birinci seçki dairəsi üzrə deputatlığa namizədliyini irəli sürsə də, son anda namizədliyini geri çəkmişdir.[8] Fikrət Yusifov 12 mart 2020-ci il tarixində Ana Vətən Partiyasındakı vəzifəsindən və partiya üzvlüyündən istefa vermişdir.[9][10][11]