нар. вуч паталди, вуч мураддалди. ТӀебиатди вучиз заз и тӀал гана? Е. Э. Заз сабур гуз. Гила вучиз кӀватӀзава Шишханада абасар? А. С. Вучиз кьарай атӀанва? Куьз хийирдихъ гъарайдач? И. И. РикӀин буйругъ. Абдул лагьайтӀа, сифтени-сифте ашукь я, чӀехи ашукь, ахпани шаир. Вучиз ам чӀехи ашукь ятӀа, чаз субутариз кӀанзава. Б. С. Халкьдин ашукь, руьгьдин шаир. Ваъ, эрекь-чехир чна гьар юкъуз целай хейлин гзаф хъвазва. Яни литрийралди. Вучиз? ЛГ. 1997, 26. XӀӀ. Синоним: куьз, тӀа ( нугь. ).
* вучиз ятӀа (ятӀани) нар. себеб течиз. Вучиз ятӀа хъел хьанава севлуьгуьм. Е. Э. Севдуьгуьм. Акъатдач кьил, гьарай эвер вучиз ятӀа и эллерин. Е. Э. Гьажимурад эфендидиз. Вучиз ятӀан инсан авач Са кар тӀалаб тийидай. Ж. ТӀалабунар.
* вучиз лагьайтӀа союз кьилин предложенида лугьузвай фикирдин себеб къалурдай придаточный предложение галкӀурдай гаф. Алфавит хуралай рикӀел хуьн лазим я, вучиз лагьайтӀа словарра гафар, списокра фамилияр, ктабрин тӀварар ва масабур алфавитдин къайдада гудай адет я. М. М. Гь. Лезги грамматика. Къенин югъ зи бахтуни гъайи югъ туш, вучиз лагьайтӀа зи батальондиз цӀийиз атанвай куьн вири москваэгьлияр я. А. Къ. Жуьгьенар