сущ.; -и, -е; -ер, -ери, -ера 1) кӀвалин майишат угьрийрикай хуьн патал хуьзвай гьайван. Хипериз яйлах, Дагълариз булах, Рагъул кицӀ къвалахъ, Чубандиз чумахъ, ХупӀ ярашугъ я. С. С. Квез вуч ярашугь я. Гьа и дере кьуна фейила, вал са чинардин тар гьалтда, гьа чинардин тарцин патав гвайди ви ирид стхадин кӀвал я; а кӀвалин ракӀарал са кицӀ ала, гьа кицӀин кӀаник кӀвалин ачар ( куьлег ) ква. С. Муслимов. ЦицӀигъ- наме. 2) куьч. герек авачиз гзаф рахадай, масадаз зарар, тӀарвал гуз алахъдайди. Вучиз сад халис инсан я, муькуьд кицӀ яз сифет инсан? Е. Э. Гьажимурад эфендидиз.
* вацӀун кицӀ, гъуьрчен кицӀ, гьуьлуьн кицӀ.
* кицӀ ятӀани, жуванди я мисал 'мукьва-кьили гьикьван писди хьайитӀани, писвал ийиз жедач' манадин ибара. Эвел заз ам суддиз вугуз кӀан хьана. Гице лугьудайбурни тӀимил авачир. Ахпа лагьана за: я зун, вугумир, герек туш. КицӀ ятӀани, жуванди я. Р. Гь. Лацу цавун кӀаник.
* кицӀин хва \[руш\]! межд. итимдиз \[дишегьлидиз\] ийидай экъуьгъун.... Хъсан я, кицӀин хва, за ви кьилел вуч уюн гъидатӀа, аку. Ф. Ламранни Муса пайгъамбардин мах. КицӀин хцин итимди вун Куьз хвенач багьаз. И. Гь. Герек авач...