туьрк, сущ.; -ди, -да; -яр, -йри, -йра низ ятӀани хъсанвал патал адан дердида ийизвай фикир, гьерекат, кӀвалах.
* къайгъу авач \[туш\] арал 'хьанвай кар, ихтилат фикир гуниз лайих туш' манадин ибара. Зи мурад гьа им я. Ахпа заз кьейитӀани, къайгъу туш. 3. Э. Кьве фронтдин командир. - Къайгъу туш, юлдаш Эмирханов, вавай устӀарвал ийиз жеда. Вахъ тежрибани ава. Герек кар хьайитӀа, чна ваз куьмекни гуда. 3. Э. Социалист Зегьметдин Герой. Темирханов. - АкӀ ятӀа къайгъу авач. - За маса хьайи хата-бала затӀ аватӀа лагьанай. Б. Гь. Вили вилер - Къайгъу туш, - лагьана ада. - За вун хуьдай чка жагъурда. А. Исм. Эхиримжи къув. - АкӀ ятӀа, къайгъу авач, цицӀигъвийриз хъуьрез ихтияр авайди я, - лагьана сивик хъвер кваз атлуди. С. Муслимов. ЦицӀигъ-наме.
* къайгъу авун гл., ни нин-куьн 1) са гьихьтин ятӀани кар кьилиз акъудун патал вядеда дердида хьун. - Адал вил эцигна акъвазун виже къведач. Са къайгъу авуна кӀанда. Са кеспидик квачиз къуьдни акъудиз жедач. 3. Э. Рамзият. \[Гуьлханум\]. Авайвал лагьаила, хъел кьвезвани? Чибур итимар туш. Чин чӀурмир гьасятда. Чизва, чунни абуру хуьзва, гъакимрин гитар хьиз, кӀвалин къайгъуярни ийизва, чпиз хушбуруз къуллугъарни, куьмекарни гузва, амма лагь, халкь патал абуру вуч ийизва? Н. И. Гьакимрин папар. 2) гележегдикай фикир авун. Аялдин къайгъу авуна кӀанда. Р. Синонимар: къайгъу чӀугун, къайгъудик хьун, къайгъударвал авун.
* къайгъу акун гл., ни нин вилик пад кьун, са кар чӀуру ийиз тун тавун. \[Али\] Селимаз лагьана кӀанда. Къуй вичин папан къайгъу акурай. Н. И. Гьакимрин папар.
* къайгъу чӀугун гл., нин нин-куьн са низ-квез ятӀани хъсан хьун патал фикир авун, кар-кӀвалах авун. Ахьтин фикирар кьиляй акъудур! Тамаш, лап экуьнихъай стхадин папа вун патал гьикьван къайгъу чӀугвазватӀа аку... 3. Э. Зун гъавурда акьазвач. Юлдаш Самурскийди къайгъу чӀугуналди СтӀал Сулейманаз, Гьамзат ЦӀадасадиз, Абдулла Мегьамедоваз Дагъустандин халкьдин шаир лагьай тӀварар гана. 3. Э. СтӀал Сулейман. Юкъуз ксуз хьана зун, йифиз руфунин къайгъу чӀугваз хьана за. А. Исм. Эхиримжи къув. Синоним: къайгъу авун, къайгъударвал авун, къайгъуда хьун.
* къайгъуда хьун гл., вуж нин-куьн никай ва квекай ятӀани фикир ийиз хьун. Хур экъисна къекъведа вун, Ви къайгъуда авазва зун... Е. Э. КӀан я. Синоним: къайгъудик кваз хьун.
* къайгъудик \[кваз\] хьун гл., вуж нин-куьн. са кар кьилиз акъудун патал фикирдик, гьерекатдик хьун. Абур пионино ва автомобиль къачунин къайгъуйрик квай. 3. Э. Социалист Зегьметдин Герой. Темирханов. Синоним: къайгъуда хьун.