сущ.; -ди, -да; -ар, -ри, -ра 1) са тайин къаст, мурад кьилиз акъудун патал ийизвай гьерекат(ар).... малуматрай ва документрай аквазвайвал, В. И. Лениназ Къ. Агьасиеван революция патал тухузвай кӀвалахдикай хабар авай. М. М. За нин бахтар чуьнуьхна хьи... Дишегьлийриз, гьа виринра хьиз, я гад, я кьуьд авачиз, кӀвалах ацӀанва. ЛГ, 1999, 11. ӀӀӀ. Зуьрнечияр, ийидай кӀвалах авачиз, деминин са кьерехда ракъиник ацукьна жеда. С. М. ЦицӀигъ-наме. Буба Гьажикулиева кьил кутур гзаф кӀвалахрихъ хъсан бегьерар хьана. ЛГ, 2002, 15. V. Синонимар: агьвалат, вакъиа, кар, гьадиса, кьиса. 2) къуллугъ. – Ам заз зун Дагъустандин радиодиз кӀвалахал атай 1959 - йисуз таниш хьана. ЛГ, 2002, 15. V. Эй Сажидин, квез я и махар?! Къалура жув кӀвалахда. С. РикӀ дарих я.
* кӀвалах(ар) авун гл., ни са нетижа кьилиз акъатун патал тайин гьерекатар кьилиз акъудун. Меслятдалди ая кӀвалах, Гуьгьуьл даим шад жедайвал... Пайи-паяр хьанвай халкьар Гьамишалугь сад жедайвал. 3. Р. Зун и пата, вун а пата. Са сеферда мукьва-кьилияр тир Вагьабни Сейфуллагь ветегадиз кӀвалахар ийиз фида. С. М. ЦицӀигъ-наме. Са-садбуру, завай кӀвалах ийиз жедани-жедачни лугьуз, шаклувилерни ийиз хьана. «Самур», 2002, No 23
* кӀвалах тухун гл., ни са вуч ятӀани кьилиз акъудиз чалишмишвилер авун. Зегьметчи ветеранди насигьатчивилин кӀвалахни тухузва. ЛГ, 2000, 29. VӀ.
* кӀвалахар къуьл хьун гл., нин кӀвалахар жуваз кӀандайвал туькӀуьн.
* кӀвалахар мух хьун гл. кӀвалах жуваз кӀандайвал тахьун. Гуьрцелдилай камна алатдайла, кӀвачин кӀаник килигна кӀанда. Чинерриз тӀуш гуда на - ви кӀвалахар мух жеда. Р. Гь. Чун чаз килигайла.
* кӀвалахдивай къерех тахьана нар. къуллугъ кьиле тухун акъвазар тавуна. КӀвалахдивай къерех тахьана, 1965 - йисуз кьилин образованидин диплом къачуна. ЛГ, 2003, 1. V. Синоним: заочнодаказ.
* кӀвалахдин вахт сущ. къуллугъ, кӀвалах кьилиз акъудзавай вахт. КӀвалахдин вахт куьтягь хьайила, кьве юлдашни галаз ам хуьруьн юкъва авай куьчедай кӀвализ хквезвай. А. Р. Кьве чин.