сущ.; -ди, да; -ар, ~ри, -ра 1) музыкадин тайин тир садвал арадал гъидай ширин сесерин галайгалайвал. КьепӀинихъ вичин макьам ава, ам гьич са алатдални тамамариз жедач. З. Гь. КьепӀинин аваз. Вич лезги яз, вич виниярагъви яз, яхул макьамдал кьуьл ийидай Рамазан акурла, Уьзденавай шиирдалди туьмбуьгь тавуна акъвазиз хьанач. С. Ярагъви ашукь Уьзден. 2) куьч. амалар, абур тегъидай амалар, фурс. Синонимар: аваз, гьава.
* макьам ягъун гл., ни-куь 1) музыкадин сесер акъудун, музыкадин гьава тамамарун. Сен Аллагь, Мердан, а чи бубайрин макьамрикай са кьве макьам ягъа, гила амай макьамри заз дад гудач. Гь. Гь. Адетдин къармахра. Зуьрнечийри кӀвалахив эгечӀдай макьам яна... Б. Гь. Заз звера. Кфилдай ягъазвай макьамдихь са кьадар яб акална теке: Кьулухъ элкъвена. Я. Ш. Гьахъ квахьдач. - Ягъа кван са макьам, - лагьана Сулеймана. С. Зазни хуш я ви шаламар. Чи батальонда авай къавкъазви са зун тир. ГалатнавайтӀани, дагъвийрин макьамар язавай чкадиз тефин заз кутугнаваз акунач. Зун фена. А. Къ. Чеченрин межлис. 2) куьч. ихтилатар авун. - Худата авай Гьуьсейналиди са макьам язава, Таркида авай Хаспулата - маса макьам. З. Р. Гьажи Давуд.