|| МЕРМЕР1 фарс, сущ.; -ди, -да; -ра, -ри, -ра 1) эцигунра ва я гуьмбетар туькӀуьруна ишлемишдай жуьреба-жуьре рангарин (лацу, чӀулав) кӀеви къван. ХарапӀ хьуй ви мармардин кӀвал, Ваз къисмет хьуй ясардин кӀвал! Ф. Надир шагь чукуруникай мани. Къецелай къенез физвай чкадик вад кӀарцӀин гурар квай. Ам мармардин къванцикай раснавай. А. А. Пад хьайи рагъ. Постаментдал мармардин Элкъуьрна вич буьруьнждиз Мурад яз килигун Гележегдиз Къуьнерилай йисарин. А. Ал. (СтӀал Сулейман). Ингье, «Мермер» къванцелай вири Магъархуьр, капаллайди хьиз, Агьмедан вилик ачух хьана. М. Гь. Им къван, имни терез. Заз гунагь тахьуй ( алцумдай мумкинвал авач ), саки кӀуьд гектардал алай Каабедин вири майдан, лацу мермер туна, безетмишнава. Ж. Мурадалиев. Гьяж. Ина \[Меккеда. - А. Г.\] са акьван четинвал авачир, эгер кьецӀил кӀвачер чиле авай мермерди, кьецӀил кьилни 45-50 градусдин чимивал авай ракъини кузвачиртӀа. Астагъфируллагь, гьаси тежен. Ж. Мурадалиев. Гьяж. 2) куьч. гуьрчег, дану, цӀалцӀам (къаматдикай рахадайла). Сифет я мармар... Е. Э. Ярдин тариф. Магьид гардан, мармардин хур аламат Акур бере гъейрид рикӀел къвез жедач. Е. Э. Жедач. Буйдиз кьакьан, гьич заз икьван Лацу мармар акурд тушир. Х. Т. Селминаз. ЦӀувад йикъан варз я чин ви мермер хьтин, - Хъуьрез тузар ви якьут, эгьмер хьтин. Е. Э. Гьалимат.