араб, сущ..; - ди, -да; -ар, -ри, -ра кӀевелай тӀалаб. Шагь-Буба халуди вичин вилер зи чӀехи бубадин вилера атомарна. Абура минет авай: къутармиша, и гьалдай акъуд! А. Къ. Нехирбанни лекь, Амма сивяй гьикӀ ятӀани Минетдин гаф акъуддач. А. Ал. Билбил. Акатзавач Анар папан, Бике рушан минетни. Т. А. Фу квахь тавурай.
* минет(ар) \[минет-суьнет\] авун гл. ни низ са вуч ятӀани кьилиз акъудун кӀевелай тӀалабун. Гъуцариз минет авуна, Гъуцариз суьнет авуна: "Чан гъуцар, аман гъуцар, Квез къурбанд хьуй экуь цавар! Куьне чалай тӀавилер, квавилер алуда! Ф. \[ФатӀимат\] - КӀватӀ жерид я гьар са миллет Чи мектебдин кӀвал, Назани, На дидедиз ая минет, Вунани ая кӀел, Назани. С. С. Назани. Диде, чан диде, буба рази тахьана тач, эгер на адаз минет авуртӀа. Гь. Гь. Адетдин къармахра. За ваз ийида яргъай пара минет: хабар це заз авай гьач. А. Гь. Хабар це. Сад Аллагьдиз минет ая, Чун сад хьана шад жедайвал. Б. С. Вилера рагъ авай руш. Заз минетар ийиз жеда, зани ваз инсафдач. М. В. Гъарасатдин майдандал. Зун, минет-суьнет авуна, лазим ракӀарихъ фейила, ана ерли маса инсан яшамиш жезвай. З. Къ. ШейтӀандин веледар.
* минет хьуй (хьурай )! межд. рахазвайдавай са вуч ятӀани тӀалабдайла, ада ваъ талягьун патал ишлемишдай ибара. Гъил акъуд на зи яхадай, Минет хьуй, алат, гуьзел яр. С. С. - Я директор, ваз минет хьуй, чи кӀвалахар туькӀуьра! Ф. Б. Филиал. - Къунши, ваз минет хьуй, зазни и кеспи чира. Ф. Куткунда гьатай жанавур. Хъсан туш. Ваз минет хьурай, Селим, алад! А. А. Умуд. - Чан балаяр, межлисар я. Минет, хьурай квез, къал-къул тахьурай. С. Ярагъви ашукь Уьзден. Минет хьурай. зи гьиссерал хъуьремир. М. М. Са бахт кӀанда. Бес адазни вун хьтин бицӀи бала авачиз жени? Ваз минет хьурай, ишехьмир, чан хва! Ж. Г ь. Жанавур.