фарс, сущ.; - ди, -да: -ар, -ри, -ра са чкадиз, кӀвадиз къерехдай атанвайди. КӀвале авай- авачир кроватдал мугьман къаткурна. А. А. Лезгияр. Дагъви суса кьабулзава мугьманар, Лежберни фячеяр рикӀ ачух тир. А. С. Вилик жерге. Дуствал такӀан касдин кӀвале са чӀавузни мугьман жедач. З. Р. Зун и пата, вун а пата. Мугьман патал рикӀер даим ачух тир Шарвилидин невеяр я лезгияр. С. Шарвилидин невеяр, Мугьманриз хваш-беш авурдалай кьулухъ вилик чай, фу гъана. А. Муграгъви. Ажалдин хура.
* мугьман авун гл., ни вуж яргъай хтай, атай мукьва-кьили, чирхчир кӀвализ элифарна шад мярекат кьиле тухун. Синонимар: мугьманарун, илифарун, къунагъ авун.
* мугьман хьун гл., вуж низ мугьман яз са нин патав ятӀани фин. Вичин ери-бине Хуьруьгрин хуьряй тир устӀар, хсуси туьквен авай Османам руш Гуьлуьшан, яшар хьанвай жегьил яз, Тагъираз ам мукьвайрин кӀвализ суварин юкъуз мугьман хьайила сифте яз акунай.. К. К. Шаирдин килфетар. Бейхабардиз СтӀал Сулейман чи кӀвализ мугьман хьайила, зун шадни хьанай, тажубни. С. Зи Сулейман. «Кард» журналдин редакциядиз лезгийрин рикӀ алай композиторрикай сад тир Халил Халилов мугьман хьана. "Кард" журн., 2004, No5.
* мугьманар аладарун гл., ни тӀуьн-хъун гана мугьманар рекье хтун.
* мугьмандиз фин гл.', вуж; мугьман яз са нин патав ятӀани фин. Гьарма вичиз гьа чпивай жедайвалди кӀвал-югъ авунвай инсанар я. Абурун кӀвалериз мугьмандиз фейилани заз са жуьре жеда. Жуван зегьмет квачиз авунвай аваданар я ман. М. В. Гьарасатдин майдандалдал. Къавумрин кӀвализ къвез кӀанзавай гадайрикай садаз, мугьмандиз фидай дамахдин чухва авач. С. Ярагъви ашукь Уьзден. Мугьмандиз алад, амма жувакай куьцӀедалди вахтунда кӀвализ хъфин рикӀелай ракъурмир. А. М. Ихьтин мугьман жедани.