нар. 1) сад хьана. - Эгер квез зун кӀандатӀа, куьне вирида санлай зи сагълугъдай санал чай хъухь. Ф. Гьуьлуьн руш. Чахъ инанмиш жемят садни амачиз, вири санлай, душмандал къарагъда, -лагьана Агьмеда... А. И. Самур. 2) вири сад хьиз фикирда кьурла. Санлай XX асирда, яни са виш йисан къене, лезгийрин 70 далай виниз хуьрер михьиз терг хьана. Тек са КцӀар районда Дабур, Яргун, Куьрел, Шелехуьр, Хуьруьнхуьр, Гурсан, Магьмудахуьр. ЦӀуру хев, Рутар, Пеленхуьр, Кучумахуьр, Легар, ЧӀаракӀар, Юсуфахуьр... арадай акъатна. М. М. Чи чкайрин тӀварар.
* санлай къачурла нар. умуми гьал фикирда кьурла. Чи коллектив гьамиша гьилле галачиз кӀвалах ийиз алахъна. Алай вахтунда, санлай къачурла, ина авай 345 кас, гьа гьисабдай яз 78 водитель чпин кеспидив рикӀ гваз эгечӀзавай инсанар я. ЛГ, 2003, 13. XӀ. Колхозчийри никӀерай ва саларай, санлай къачурла 28459 манатдин къимет авай культураяр кӀватӀна... ЛГ, 2004, 8. V. Санлай къачурла, "Эбеди ктаб" вичиз тешпигь авачир багьа ктаб хьанва. Амма гьар са гуьзелдик са синих жеда лагьайвал, гьайиф хьи, адак хейлин нукьсанарни квачиз туш. А. М. "Эбеди ктабдикай" веревирдер.