|| СЕКИНУН гл., ни вуж-вуч; -да, - на; -из, -зава; -а, -ин, -рай, -мир; секин ( ар ) тавун, секин ( ар ) тахвун, секин ( ар ) хъийимир 1) секин гьалдиз гъун. Арифдарар, секинра зун, бес я дуьньяд кайивал! Е. Э. Дуст. Большевиквилин лавгъасузвили ва вичикай гзаф истемишуни ам хьайи агалкьунрал секинардачир. З. Э. ЧӀехи шаир. Рамиз сагъ-саламат тирди чир хьуни зун са кьадар секинарна. ТА. Мехъер куьтягь тахьанмаз.; Къведай рекье чахъ галаз хъивегьиз, чавай пулар тӀалабиз, суьгьбетар ийиз, «куьн Афгъандиз тухудайди туш» лугьуз, чун секинариз, чи хамуна гьахьиз хьайи ам гила садлагьана дегиш хьана А. Къ. Аскервал башламишай югъ. КӀанзавачир пехъи цӀаяр хъиткьинна, КӀанзавай гьакӀ ватандашар секинна. К. Агьмедов. Кьисмет. Оборонадин министр Сергей Иванова общественность секинарун патал малумарайвал, армия хуьз эвер гунин отсрочкайрин кьадар тӀимил жедалди талукь тир законопроект туькӀуьрдач. Т. 2004, 26. VӀӀ. 2) руш гъуьлуьз гун ва я гададиз свас гъун, эвленмишун. Зун Аллагьди гайиди я, Дидед гана, секинайтӀа, Ф. Синоним: секин авун 3) кечмиш хьайиди сурук кутун. Рухвайриз чпин диде чпин гъилералди секинариз кӀанзавачирни? Пагь, акӀ кӀанзавай хьи. А. Исм. Вацран мичӀер. Къе хьиз рикӀел алама, буба секинарайдалай кьулухъ зун кӀвалин пипӀе, кьил хура туна, генани гъвечӀи хъхьана, агаж хьанвай... Ж. Гь. Руьгьдин, рикӀерин къелечи. Синоним: умунарун.