араб, сущ.; -ди, -да; -ар, -ри, -ра 1) са тайин кӀвалах авун истемишун, тӀалабун, минетун. Къиргьарамбашияр и теклифдал рази хьана, рушаз, чай авуна, гуда ва чпини хъвада... Ф. Гьуьлуьн руш. Вичиз я югъ, йиф тийижиз, Я гьукум, теклиф тийижиз... С. С. Акьул жуваз аваз кӀанда. 2) меслят(ар). Са бязи муаллимри, аялри дидед чӀалаз артух фикир гун патан, жуьреба-жуьре теклифар гана... X. Шайдабегова. Дидед чӀал чируниз артух фикир.
* теклиф авун га 1) тайин са фикир арадал вегьин. Алмасов бирдан кис хьана, ахпа ада гьич садани гуьзлемиш тавур са теклиф авуна... А. А Умуд. Алимди акьван асант кӀвалах хьиз теклифар ийизвай хьи, на лугьуда ада и тежриба накь вичи авурди я. А. А, Лезгияр. 2) тӀалабун (са кар авун). Ваз илифиз теклиф ийин, Аман, бедназар я, гуьзел. Е. Э. Гуьзел, за ви тариф ийин. 3) са вуч ятӀани низ ятӀани хьун тӀалабун. ... абуру адаз артух гьуьрметар ийиз, недай-хъвадай теклиф ийиз хьана. А. Ф. Бубадин веси.