туьрк, прил. тебятдиз бегенмиш жедай. Дустунин дуствилелай хуш дуьньяда мад нямет авач. Е. Э. Чуьхвер. Нянин мензилдив агакьайла, ара хелвет береда вичелай вилер алуд тийизвай рушан япал Риза- Къулиди кьуд-вад хуш келима лагьана. З. Р. Гьажи Давуд: Велимет виридаз хуш кас я. М. В. Гьарасатдин майдандал.
* хуш атун (хьун ) гл., низ вуж-вуч тебятдиз бегенмиш хьун. Вучиз кӀандач ваз агатиз, Заз хуш тирла вав луькӀуьниз. Е. Э. Ярдиз. Гьуьсейноваз, я вич директорди къаршиламишун, я вичиз ада гайи жаваб хуш хьанач. А. А. Умуд. Селима жаваб ганач. Адан чин чӀур хьуни ва жендек са гьикӀ ятӀани тегьерсуз гьалда галтад хьуни Зелфидиз вичи вугай суал адаз хуш татайди малумарна. А. А. Умуд. Азербайжан - Дагъустан кьве стха я, Абур, санал хьайила, хуш жечни бес! А. С. Низамидин гьезел хьиз. Бязи ксариз тарихда хьайи крарикай хуш къвезвач. М. М. За нин бахт чуьнуьхна? Дидедиз хуш атайла, ада шиир майдандизни акъуддай. Ж. Гь. Руьгьдин, рикӀерин къелечи. Эгер кӀвале жуван хайи чӀалал рахазвачтӀа, а хизандай тир аялдиз школада дидед чӀал чирун хуш къведач, я адалай и кар алакьни ийидач. X. Шайдабегова. Дидед чӀал чируниз артух фикир.
* хуш-беш авун гл. чпин арада мукьвавал, чирвал авайбуру, чеб-чпел гьалтайла, хабар кьун, рахунар авун. И сефердани Зелфидиз учительницадин патав ацукьна, хуш-беш ийидай вахт авайди тушир. Анжах Марьяман хатурдай ам атана. А. А. Умуд. Вири Къамкъам хтунал шад я, адаз хуш-беш ийизва. Гь. Къ. Четин бахт.
* хуш налук куьгь., сущ.; гуя хушуналди гузвайди яз гьисабна, советрин гьукуматди халкьдивай кӀватӀай налогрикай сад. Бязибуру зи намусдал хабарсуз, Хуш налук хьиз. намуссузвал вегьезва. Заз инсанар, кьизилдихь хьиз, са юкъуз Намусдихьни тамарзлу жез кичӀезва. М. Б. Заз кичӀезва.