сущ.; -у, -у; -ар, -ари, -ара 1) са тӀимил яргъивилихъди фейи цӀар (гумадин, цӀун). Чина берекатлу яр жедай, заз а яр хьран цӀун чӀунар хьиз аквадай А. Къ. Нехирбанни лекь. Магьсуда, са папӀрусдиз цӀай яна, къалин гумар акъудна. Къезил шагьварди гумадин чӀунар гьасятда кӀвал тирвал чукӀурна. М. В. Гьарасатдин майдандал. 2) рангариз вегьин патал гамунин гъалар кӀватӀдай тегьер. Алимат галаз гъалар рангариз вегьез фейила, зи са чӀун квахьна. Р.
* чӀун галаз нар. са тӀимил яргъалди чӀугуна. Тамадади ацӀай карч ичӀи авуна, ичӀиди ацӀуриз ЦӀарудив вахгана, спелрилай гъил чӀугуна, спелрикай хъуьрез-хъуьрез, гафар чӀун галаз сивяй акъудиз-акъудиз, лагьана. А. Къ. Нехирбанни лекь. – Яда-а-а, чӀун галаз сес акъажна Якьуб Яралиева, - вунани лагьана, чан Расим. А. Фет. Жамидиникай суьгьбетар.