сущ.; -уьни, -уьна; -вер, -три, -вера 1) чун элкъуьрна кьунвай гьакъикъат вилериз аквадайди хьурзавай нур. Экв такур буьркьуьдаз Шамси къемердин къадри вуч чир хьуй?! Е. Э. Дуьньядикай бейхабардаз. Зи вилери са назик экв са уьтери кьатӀана. М. В. Вацран ягъун. 2) мичӀи вахтунда фонардин ва я цӀун нур. Сувараз яргъай, хуьряй эквер акуна. А. И. Самур.... эквер куькӀуьнарна, ишигълаваннавай шуьшебенддихъ ва тарарин арайрай аквазвай, цифер алатна, ачух жезвай цавухъди вил яна, кьуьзек ислягь хьана. Б. Гь. ТӀварун стхаяр. Къулан патав, цлаз янавай кьулуналлай, лупӀ-лупӀ ийиз туьхуьз туьхуьн тийизвай псисдин экуьник аялрин чинри шадвилин цӀарцӀар гана. З. Э. Муькъвел гелер. Синоним: ишигъ.
* экв аламаз нар. мичӀи жедалди, нянин вахт алукьдалди. Экв аламаз ксайди экв жедалди ахварай аватун лазим я. Р.
* экв тун гл. 1) чун элкъуьрна кьунвай гьакъикъат вилериз аквадайвал авун. 2) куьч. авай гьалдай хъсан гьалдиз акъудун, акъуддайвал авун. Хирер цийибуруз, Гъетер мичӀибуруз, Гъилер ичӀибуруз, Рекьер кӀевибуруз Са экв це, Куьмек це! Лувар це, Бахтар це! А. Къ. Дуьа..
* экв < малум > хьун гл. югъ алукьзавай сифтегьан лишанар дуьздал акъатун Экв хьайила, пачагьди абур са-сад ракӀарай акъудиз, ахтармишиз туна. Ф. Халуни хтул. Пакамаз экв жедалди зун къарагъна чуьлдиз хтана. А. Ф. Бубадин веси. Малум жезвай экуьнихъ галаз гьаятдиз шелдин ванер чкӀана. М. В. Гьарасатдин майдандал. Йифиз геж хьиз, экв жез мукьва ам, буба кӀула кьуна, кӀваляй экъечӀна. Н. М. Буба.
* < са > экв такун гл., никай низ хъсанвал, къулайвал тахьун. \[Рамазан\]. Ваз абурукай кьадай чка жагъидач!. Ваз чидачирни, уьмуьр абурун ракӀарал пуч хьана кьейи ви бубадиз абурукай са эквни такурди, Вазни акур са югъ авайди туш... Ж. Эфендиев. Азадвилин рекье,... ада вири уьмуьр гана чӀехи авур са хцикай бубадиз са эквни акунач лугьуз шеларзавай. А. Къ. Нехирбанни лекь.
* экв хьайила, регъве авайдазни чир жеда мисал 'важиблу кар арадиз атайла, виридаз чир жеда' манадин мисал.
* экв ягъун гл., ни низ-квез экуь авун. Чирагъди кьуд патаз экв яда. Са вичиз ада экв ядач. А. А. Лезгияр.
* экуьн хийирар ! кил. сабагь хийирар!
* экуьнин ярар сущ. пакамахъ цавун кӀан яру жедай вахт. Синоним: пакаман ярар.