1. Tez-tez yumub-açmaq, örtüb-açmaq (gözü, kirpiyi).
Musa kişi dərinlərə getmiş, təkcə giləsi işıldayan gözlərini qırpdı.
□ Göz qırpınca – bir anda, göz yumub açınca.
Göz qırpmamaq – qorxmamaq, çəkinməmək.
Ən qanlı savaşlarda qorxu bilməyən, ən müdhiş həqiqətlərlə üz-üzə gəldikdə gözünü belə qırpmayan Qazan xan röyadan çox qorxardı.
Gözlərini (kirpiklərini) qırpmadan (qırpmayaraq) baxmaq – gözlərini yummadan baxmaq.
Cəlil başını sərt bir hərəkətlə dik qaldırdı, kirpiklərini qırpmadan durğun bir nəzərlə … baxdı.
// Gözlərini zilləyib baxmaq, gözünü çəkməmək.
Zeynəb də Nadirin kəmetinalığını gördükdə sakit oturub gözlərini qırpmayaraq otağın bucağında asılmış tüfəngin çaxmağına baxırdı.
2. Bir şeyin qıraqlarını, uclarını və s.-ni kəsib atmaq, kəsmək, vurmaq, balaca-balaca qoparmaq. Lampanın fitilini bir az qırpmaq lazımdır.
3. Dişləri, ya dimdiyi ilə dartıb qopartmaq. Qazlar otu qırpırdılar.