Rəfiqə Hüseynzadə

Rəfiqə Hüseynzadə — Azərbaycan Respublikası Dövlət Neft Şirkətinin, (SOCAR) Ekologiya üzrə vitse-prezidenti (2011–2023), alim. SOCAR-ın tarixində bu vəzfiəyə təyin olunan ilk qadın vitse prezidentdir.^[1]

Rəfiqə Hüseynzadə
Rəfiqə Abdul Ağa qızı Hüseyn-zadə
Doğum tarixi	1952
Doğum yeri	Bakı şəhəri
Həyat yoldaşı	Çingiz Hüseynzadə
Milliyyəti	Azərbaycanlı
Fəaliyyəti	siyasətçi
Partiyası	Yeni Azərbaycan Partiyası
Mükafatları	2010

Hüseynzadə Rəfiqə Abdul Ağa qızı 1952-ci ildə Bakı şəhərində ziyalı ailəsində anadan olub. 1974-cü ildə M. Əzizbəyov adına Azərbaycan neft və kimya İnstitutunun (Azərbaycan Dövlət Neft Akademiyası) "Neft-qaz yataqlarının axtarışı və kəşfiyyatı" fakültəsini bitirmişdir. 1975–1985-ci illərdə İnstitutun aspirantı və əməkdaşı olmuşdur. 1981-ci ildə "Aşağı Küryanı neft-qaz yataqlarının geokimyəvi xüsusiyyətləri" mövzusunda namizədlik dissertasiyasını müdafiə etmişdir. "Quyularda neft hasilatının artırılması" patentinin müəllifidir. Xanım Hüseynzadə 70-ə qədər məqalənin və elmi araşdırmanın müəllifidir. Bundan başqa, "Discover Azerbaijan" kitablarının birinci və ikinci buraxılışının, eləcə də "Azerbaijan and United Kingdom 100 Years of Partnership" kitabının həmmüəllifidir.

Rus, ingilis və türk dillərini bilir.

1985–1999-cu illərdə Azərbaycan Dövlət Universitetinin "İzotop tədqiqatları" laboratoriyasında elmi işçi, baş elmi işçi və laboratoriya rəhbəri vəzifələrində çalışmışdır. 1999–2011-ci illərdə ARDNŞ-nin təsis etdiyi "Azlab" MMC-nin Baş direktoru olmuşdur.

Azərbaycan Respublikasının Prezidenti İlham Əliyevin Sərəncamı ilə 2011-ci ildən Azərbaycan Respublikasının Dövlət Neft Şirkətinin Ekologiya üzrə vitse — prezidentidir. O, bu vəzifəyəy təyin olunan ilk qadın vitse prezidentdir. Eyni zamanda BDU-nun "Faydalı qazıntılar" kafedrasında 2001-ci ildən elmi fəaliyyətini davam etdirir. 60-a yaxın elmi məqalənin müəllifidir. 1997-ci ildə Xyustonun HARC elmi-tədqiqat Mərkəzində (TEXACO şirkətinin dəvəti ilə) çalışmışdır. Norveçdə — Tronheym şəhərində "Geolab" şirkətində treyning keçmiş, "Statoyl" şirkətinin "Reserch Center" mərkəzində çalışmışdır. 2004-cü ildə "Bone and Robertson" şirkətinin təşkil etdiyi rəhbərlik kurslarının sertifikatını almışdır.

1 avqust 2023-cü ildə Azərbaycan Respublikası Dövlət Neft Şirkətinin vitse-prezidenti vəzifəsindən azad edilib.^[2][3]

- Azərbaycanda ilk dəfə olaraq karbon kreditlərinin sertifikatlaşdırılması layihəsi uğurla icra etmişdir. Layihə çərçivəsində “Azneft” İB-nin “Bibiheybətneft” NQÇİ, Ə.C.Əmirov adına NQÇİ, H.Z.Tağıyev adına NQÇİ, N.Nərimanov adına NQÇİ və “Abşeronneft” NQÇİ-də monitorinqlər keçirilib, sızma mənbələri müəyyənləşdirilib və onların aradan qaldırılması üçün müvafiq tədbirlər görülüb. keçirilmiş layihənin nəticəsi olaraq 14 500 ton CO2 ekvivalentində emissiya həcmi sertifikatlaşdırılıb və müvafiq qaydada satılıb. Layihənin icrası nəticəsində SOCAR 3 milyon manat mənfəət əldə edib.

- Böyük Britaniya Parlamentinin Lordlar Palatasında “Collaborative Award 2018” mükafatına layiq görülüb.

- 2012-ci və 2015-ci illərdə “Səmt qazının yandırılmasının azaldılması istiqamətində olan layihələr” nominasiyasında Rəfiqə Hüseynzadənin rəhbərliyi ilə təqdim olunan layihələr Dünya Bankı və GGFR Təşkilatı tərəfindən yüksək qiymətləndirilmiş və “Award Excellence” - “Ali mükafat”larına layiq görülmüşdür. Belə ki, bu layihələrin icrası nəticəsində 20 il ərzində atmosferə atılan illik 2 milyard m3 aşağı təzyiqli səmt qazlarının dəniz platformasında tutularaq istehlakçıya ötürülməsinə başlayıb.

Azərbaycan Respublikasının Prezidenti İlham Əliyevin müvafiq Sərəncamları ilə "Tərəqqi" medalına və "Əməkdar mühəndis" fəxri adına layiq görülmüşdür.

Dekabrın 13, 2018-ci ildə Böyük Britaniya Parlamentinin Lordlar Palatasının "Collaborative Award 2018" mükafatının "Collaborative Pathfinder Award" nominasiyasında beynəlxalq mükafat ilk dəfə Azərbaycandan SOCAR-ın ekologiya üzrə vitse-prezidenti Rəfiqə Hüseynzadəyə təqdim olunub.

2022-ci ildə İlham Əliyevin sərəncamı ilə Azərbaycan Respublikası neft sənayesinin inkişafında xidmətlərinə görə "Şöhrət" ordeni ilə təltif edilib.^[1].