|| ВАРА(КИ)! межд. " килиг гьа! " манадин гаф. Мад вара ихътин кар тахьуй, Гьамиша кӀвал ишигълу хьуй. М. А. Мирзалидиз. Къугъван чун кутӀуниз вилер: Бараки Садни гьат тавурай гъиле! А. Ал. Аялвиликай баллада.
* вара-вара(ки ) ! межд. 'килиг гьа!' манадин ибара. -Вара-вара зун хкведалди куьне иниз цавай фидай нуькӀни ахьайиз тахьуй!, - лагьана, ибурузни буйругъ гана. Ф. Кесибдин хва Къагьриман. \[ Мирим \]. Вара- вара и калхуздик гьич экечӀиз тахьуй. Гь. Гь. Колхоз. Вара-вара ам, хъел кваз, я хъвер кваз рахадайла, къаншарда итим хьайитӀа, русвагь хьана. Къ. М. РикӀелай фидач, инсанар. Вара-вара ягъалмиш жез тахьуй. Къ. Къ. КӀири Буба.
* вара-зара авун гл., ни вуч; вуч ятӀани са манани авачиз, пуч авун, гъиляй вегьин. Жуван аялрин гъиляй ажуз хьана, ингье, абур гваз жегьил уьмуьр варанизара авунвай кас я. Къ. М. Дагъларин деринрин булахар. РикӀиз тӀал акъудзавайди а еке зегьметралди вирида санал битмишарай чӀехи девлетар гила вара-зара авун я. М. Жалилов. «... Фу гайиди я гьамиша».
* вара-зара хьун гл., вуж-вуч; са манани авачиз харж хьун, амачир гьалдиз атун. Гьа икӀ халкьдин пуларикай Са пай вара-зара хьана. Ж. Зав пул атӀур машин гван. Иеси авачир кӀвалени, гьар вуч хьайитӀани вара-зара жеда. ЛГ, 1993, 16. ӀӀӀ.