фарс, сущ.; -ди, -да; -ар, -ри, -ра инсандин кьил къуьнерихъ галаз, гьайвандин, къушран жендек башламиш жезвай чкадихъ галаз сад ийизвай бедендин пай. И вахтунда жегьил гада, нуькӀ хьиз, балкӀандин гардандик ккӀана, Ф. Гьуьлуьн руш. Юекре вичин лувар юзурна, ахпа, гардан хкажна, гьарайна: - Уь-уь-уь-уь-уь-уь. Лезги халкьдин махар. Къизилгуьлер хура туна, Дурнади хьиз, гардан кьуна... Е. Э. Вун хвашгелди, сафагелди. Аквазвани, гардандал са чӀиб ала, юкь закӀалда авайд я. 3. Э. Пата вил авайди. ЦӀаруди хъуьруьн кваз гардандилай гъил алудна. Б. Гь. Заз эвера.
* гардан агъузун гл., ни-куь низ-квез икрам авун. Гьар са куьни зи зегьметдин вилик гардан агъузна... А. М. Бахтар.
* гардан киле хьиз авуна нар. куькдиз, тухдиз, кефлу яз. - Я стха, Абас, - лагьана, гаф къачуна рехи чуру квай касди. - Гардан киле хьиз авуна, руфун чали хьиз экъисна, гада-гуьдуьйрихъ галаз ацукьна эрекь хъвадайла ваз регъуь кьванни жедачни? Къ. Къ. ЧӀурун паб.
* гардан кӀир авун (кӀирун) гл., ни низ алчах хьун, алчахвал къалурун, ажузвал авун. И инсанвилин лайихлувал Сулеймана лап рекьидалди хвена ва... душмандин вилик гардан кӀир авунач. Ам гьамиша кьил хкажна къекъвез хьана. А. А. ( СтӀал Сулейман. Гардан кӀирмир вуна икьван, Азад чуьл я къе ви макан. X. Т. Беневша. Залан игьтияжди гьелекнавай, ада муьжуьд йиса авай Тагьирни юкь какуруниз ва гардан кӀир авуниз мажбурнай. А. С. Хуьруьг Тагьир. Жир авуртӀа сада гардан, Вични рази тир и кардал. Ж. Гуьгьуьл кьун патал.
* гардан кӀирвал сущ.; гардан кӀир авунавай гьал, масадаз жув алчах хьурнавай гьал. Душманриз гардан кӀирвал Гьич герек туш а фагъирвал. С. С.
* гардан кӀир хьун гл., нин; алчах хьун. Михеннатдиз лугьуз агъа, Адаз гардан кӀир жедайд туш. С. С. Къара пулуниз.
* гардан ягъун гл., ни нин; рекьин, чан хкудун. Ваъ, пачагь, вун сагърай, гардан вуна зи ягъайтӀани, аниз завай хъфиз жедач. Ф.
* гардан яцӀу хьун гл. нин куьк хьун, лавгъавилин лишанар хьун, дамах къачун. Эхирки ришвет къачурдан Гарданни яцӀу жедайд туш. С. С.
* гарданда еб авайди хьиз нар. ашкъи авачиз, такӀанз-такӀанз. Пеле шуьткьверар туна, вилер агажна килигун адаз куьгьне заманада, лап гарданда еб авайди хьиз, кӀвалахал физ, вич Бакуда, рикӀ хуьре амай вичин папан аялрин патав гумаз хьайи вахтарилай ирс амукьнавайди тир.. 3. Э. Буругъдин устӀар.
* гардандал акьадарун кил. кьамал акьадарун.
* гардандин кӀарарай акъудун гл., ни вуж кьин, рекьидай гьалдиз гъун. Зейдуллагьдин ракъини канвай чин, яргъи яхун гардан акур бехилчиди гьарайдай: Куьне са бязибур гардандин кӀарарай акъудмир, вирида сад хьиз яла. С. Муслимов. ЦицӀигъ-наме.