туьрк, сущ.; -ди, -да; -ар, -ри, -ра гьарай-эвер алай гьуьжет, гьарай-вургьай. Ай Сулейман, кваз и ялар, Нивди я ви къалмакъалар? С. С. Фагьумна за. Эгер вуна акӀ фикир авуртӀа, вуна лап сифте йикъалай эгечӀна стхадин кӀвале рахун-луькӀуьн ва къалмакъал твада. 3. Э. Зун гъавурда акьазвач. Абурун къалмакъал гьа идалди куьтягь жедатӀа лугьуз, фикирзава. Я. Ш. Гьахъ квахьдач. Синонимар: къал, гьарай-эвер.
* къалмакъал авун \[акъудун\] гл., ни гьарай-эвер алай гьуьжет, гьарай-вургьай арадиз гъун. Синонимар: къал авун \[акъудун\], гьарай-эвер авун.
* къалмакъал акъатун \[хьун\] гл. гьарай-эвер алай гьуьжет, гьарай-вургьай арадиз атун. Салам гана кӀвализ мугьман атайла, Винни папан къалин къалмакъал жеди. Е. Э. Пис папаз. РикӀ рикӀел элуькьиз жеда къалмакъал. Аман Рамзият, масан РамзиятӀ 3. Э. Рамзият. Жемятдин ихтиярда авай чилер пайдайла, гьуьжетар, къалмакъал тахьана амукьдачир. С. Муслимов. ЦицӀигъ-наме. Са шумуда, къалмакъал акъатдайди чиз, хъванвай Рустам са патахъ тухвана. Т. А. Мехъер куьтягь тахьанмаз.