араб, сущ.; -ди. -да: -ар, -ри. ра хабар. Гьар илимдиз я вун даях, Дуьньяд гьарна авай суракь. Е. Э. Ви рутба гьуьндуьр авурай. \[Мегьамедбег\]. Абурун дестедин старшияр вужар тир, гъихьтин фурмайрин итимар тиртӀа, суракь гьатначни ваз? Ж. Эфендиев. Азадвилин рекье. И пад, а пад Са халкь я! Кефердани, Кьибледани, Авайди ви Суракь я! Кис хьайитӀа, квахьда суракь, Жувал хъша, жувал, халкь!! М. М. Жувал хъша. Я хва, ви чӀехи буба Шабур, Аллагьди вичиз рагьмет авурай, мерд, кьегъал кас тир. Адан суракьар яргъариз чкӀанвай. С. К. Негь.
* суракь авун гл., ни вуж-вуч са вуж-вуч ятӀани жагъурун патал хабар(ар) кьун. Гатфарин кӀвалахар атана яцӀа гьатнавай вахтунда чатун устӀар кьена жемят кӀеве гьатна. Гзаф чкайрай суракь авуна, эхирни ам жагъана. М. М. Гь. СтӀал Сулеймана азербайжан чӀалал туькӀуьрай шиирар. СтӀалдал чи хуьряй тухвай са дишегьли алай. Суракь авуна, зун гьадан кӀвализ фена. З. Э. Зулун пеш. Суракь ийиз-ийиз фейи Къаюм Мухтароврин казармадиз акъатна. З. Э. КУТВ-диз фена. Суракь авур кьван чкайрай санайни заз адакай баян ганач. Н. М. Къизилдин хтар.
* суракь акъатун гл., нин-куьн герекдан малумвал хьун. - Я паб, хьана ман. А зегьримар завай къачун хьана, суракь акъатайтӀа, хгун хъийида. З. Гь. Залан кам. Девлетханан итимар атана виринра къекъвена. Санани суракь акъат тавуна атайвал хъфена. А. И. Къиргъин.
* суракь-селягь рах., сущ.; малуматар гунар, хабарар кьунар. Пакад юкъуз адан балкӀан квахьна. суракь-селягь пара хьана. ЛГ, 1992, 14.1
* суракьда < аваз > хьун гл., вуж нин-куьн гереквилин хабарар кьаз хьун. Фекьиди Алирзадиз вичин меслятар къалурзавай араба адан суракьда авай чавушди Алирза эверна сельсоветдиз хутахна. З. Э. Муькъвел гелер. Сад гьерен, сад кӀелен, садни сагъ суьруьдин суракьдава. И. Гь. Рубаияр. Къециндалай кьулухъ за жуван гунагьар алудун патал алакьдай хъсанвилер авунин суракьда жеда. С. Ярагъви ашукь Уьзден. * суракьда (суракьра) гьатун гл., вуж нин са вуж-вуч ятӀани жагъурун патал хабарар кьадай гьалда хьун. Ихьтин чӀаларин ван хьайи Демар Сердеран суракьда гьатна. С. Ярагъви ашукь Уьзден. А гададини вич и гада вуж ятӀа чириз кӀанз суракьра гьатайди хиве кьазвай. Н. Насруллаев. Кьве Мегьамед.
* суракьдиз атун гл., вуж нин са вуж-вуч ятӀани жагъурун патал, хабар кьаз атун. Зулейха гъуьл квахьнава лугьуз, чӀар-пут чухваз, йифен юкьвара Сабиран кӀвализ суракьдиз атана. З. Э. Рекьер сад туш. Антоним: суракьдиз фин.
* суракьдиз фин \[ экъечӀун \] гл., вуж нин са вуж-вуч ятӀани хабар кьун, жагъурун патал къекъвез фин. Шихэмир Исмаил-эфендидин суракьдиз фена. С. Ярагъви ашукь Уьзден. Эхир, экъуьгъиз-экъугъиз вичин уьмуьрда сад лагьай сефер нек галачиз пакаман нагьар авуна, ам мад нехирдин суракьдиз экъечӀна. Б. Гь. Заз эвера. Антоним: суракьдиз атун.