сущ.; у, -а; -ар, -ари, -ара кьейиди кучуддай чка. И чилерал, Мусаиб, ви сур алач, Цуьк эцигдай кӀани руша, дидеди... А. С. Итимвилиз герек авач тарифар... Итим тирла шехьайтӀа вун, Сурайни ваз къаргъишда за! А. С. Хцихъ галаз ихтклат. Хциз бармак къачуна сур рангадин, ( Са виш йисан яргъа хьуй сур гададин1 ), Афардикни теймесхан, сур; хъчадин Тавар ава тавуна, къе лагьайтӀа. И. Гь. Къе лагьайтӀа (тежнис). Акъатайла дережадин гурариз, Гъич рехъ гумир азгъунвилин крариз. Вил вегьена кьейибурун сурариз, И дуьньядал регьимлу хьухь, инсанар! Ш. Агьакеримов. Регьимлу хьухь, инсанар! Ингье сурук кутунва ам, Къвалахь къванер эцигна. Накьвар вегьез башламишна, Перцихъ цӀилер гилигна. М. Б. 1985- йис.. Синоним: къебристан.
* стхавилин сур.
* сур атӀун гл., ни низ чиле сур эгъуьнун. Хуьре сур атӀудай кас бегьем 'жагъизмачир. Вири дяведа авай. З. Ф. РикӀелай фидач.
* сурун къван сущ. сурун кьилихъ акалдай кьул хьтин къван. Зун хьиз, хуьруьз хтанвай са касди лагьана: «Сурун къванерал гафар лезги чӀалалди кхьин лазим я. ТахьайтӀа, вахтар алатайла, бязи душман ксари, къванерал кхьенвай «оглы», «гызы» гафар къалурна, инагар чи чилер я лугьуда». М. М. Уях хьухь, лезгияр! Сурун къванцел кьве тарих я Кхьидайди кьейила. С. РикӀ дарих я.
* сур-кьул атӀун гл., ни нин кьейиди кучудай пуд йикъалай а мярекатда артух иштарак авур (сур атӀай, мейит чуьхвей) ксариз тӀуьн гун. - Пака, Кьасум халу, сур-кьул атӀайбуруз чи кӀвализ ша лагь, рази авуна кӀанда. Маса гудай кьве лапаг авай касни суракьа. З. Гь. Бубадин кӀвал. Чи хуьруьнви Бейдуллагьаз Эредар тӀвар алай чкадал кьенвай итимдин мейит акуна. Ада ам, балкӀандаллаз хкана, сур-кьул авуна.,., кучудна. ЛГ, 2004, 8.Ӏ. Синоним: пуд йифер (вер) гун.