араб, сущ.; -ди, -да; -ар, -ри, -ра хиял. Жуван фикир жуван кьиле хьанач таз... Е. Э. Зун атана. Садбру ам \[Етим Эмин. - А. Г.\] ва адан бубаяр Ахцегь райондин Ялцугърин хуьряй хьунухь къалуриз, масабуру ам Къубадин лезгийрикай я лугьуз, пуд лугьудайбуруни амни, хиналугъ Эмин лугьудай ашукь акадриз, чеб субут тежер бинесуз фикирар арадал акъудзава. М. М. Гь. Шииррин кӀватӀал туькӀуьрайдан патай (1941 ). «Идаз фитне авур кас авани?» - лагьай фикир гьатна адан рикӀе. З. Э. Муькъвел гелер.
* фикир авун гл., ни никай-квекай 1) гьакъикъатдин гьалар сад-садав гекъигна, са гьихьтин ятӀани къейд авун. «За вуч ийин, вуч тийин», -лугьуз, фикирар ийиз амукьна има. Ф. ЦӀицӀали. Фикир ийиз килиг чилиз, Акьул жем ая ви кьилиз... С. С. Бендедин рикӀ хьайитӀа дуьз. 2) гъамлу хьун. Фикир мийир, гуьзел суна, Эмин шад я вун акунал. Е. Э. Эмин гада. 3) са тайин кар тамамарун, кьилиз гъун. Къуьнел квар алай рушар акурла, гьейран жемир абурал, гадаяр. Гьаятриз яд чӀугуникай фикир ая. С. К. Квар.
* фикир \[гьам\] чӀугун гл., ни гъамлу гьалда гьатун. Женнет либас алукӀнавай булахдал Амукьна зун чӀугваз фикир, гуьзел яр. Е. Э. Заз булахдал яр акуна. Синоним: фикирун.
* фикир гун гл., ни 1) ни низ-квез са вуж-вуч ятӀани авай гьал чирдай алахъунар авун. Сулейманаз тийижир фарс чӀалакай акьван рахадалди, абуру шаирдиз лап тӀимил хьайитӀани чидай урус чӀалаз фикир ганайтӀа, дуьз жедай... М. М. Гь. СтӀал Сулеймана азербайжан чӀалал туькӀуьрай шиирар. Са кардиз мад фикир гун. Са чӀалай маса чӀалаз гафар кьведайла, абурун мана гафар кьабулзавай чӀала я дегиш тахьана амукьзава, я са жизви дегиш хьана. М. Алипулатов. Лезги чӀалан машгъулардай грамматикадай материалар. 2) фагьумун. Фикир гайла, и дуьньядин гьисабар заз хиял хьиз я... Е. Э. Гьажимурад эфендидиз. Гила, фикир гайила, бес Селминаз куьн пешедин иеси хьуй?! Велимет фикирлу хьана. М. В. Гьарасатдин майдандал.
* фикирди тухун гл. вуж са никай-квекай ятӀани хиялар ийиз масадбур акван тийидай гьалда хьун. Гьажирамазана садлагъана жаваб ганач. Ам хейлин гагьди фикирри тухвайди хьиз акъвазда. - Я хуьруьнви, зунни фадлай и карди фикирди тухванва, вучдатӀани чин тийиз ама. А. И. Самур.
* фикирдик акатун гл., вуж гъамлу хьун. Са шумуд йикъалай юргъун хьана фикирдик акатнавай Мегьамедрасул хуьруьз хтана. А. И. Самур. КӀелиз-кхьиз течир вичи гьикӀ кӀвалахдатӀа лугьуз, Али фикирдик акатна. А. И. Самур. Дуьздаказ лагьана кӀанда хьи, и колхоз хьтин чӀехи майишатдиз регьбервал гуз алакьдатӀа лугьуз, фикирдик акатнай. А. Шагьмарданов. Майишатдиз регьбервал гуникай веревирдер.
* фикирдик кваз хьун гл. фикир ийизвай гьалда хьун.... зи фикирдалди, Ахцегь райондин руководстводи ихьтин надир устӀардиз вичин рикӀиз кӀанивал кӀвалахдай мумкинвилер, тайиндиз лагьайтӀа, вичин фикирдик квайвал, Ахцегьа чекмеяр цвадай махсус фирма кардик кутадай вири шартӀар яратмишнайтӀа, хъсан тир. ЛГ, 2004, 15. VӀӀ.