\[ччир\]: * чир авун гл., ни гьакъикъатдин дуьзвал аннамишун. Тарикъат чир ийизва цӀийи-цӀийи муьруьдриз Жамалдина. А. Къ. Ярагъ Мегьамедан гъазават. Са дагъвидиз, къарагъайла, гьаятдай Пуд балкӀандин гелер фенваз акуна. - Гадаярни кӀвале ама исятда, Вужар хьурай? Тадач хьи чир тавуна. М. Б. Гьуьрмет. Гьахъни батӀул чир тавуна, Рахазвайдаз такӀан я зун... Ш. Садихов. Я дуст кас! Синоним: чирун.
* чир хьун гл., вуж-вуч са кардин авай гьакъикъат дуьздал акъатун, тайин хьун. Адаз акунмазди, им вичин гъуьлуьн буба тирди чир хъхьана. - "Ам тевледа тур", - лагьана пачагьди эмирна. Ф. Гьуьлуьн руш. Ви гьакъикъат чир хьанач хьи заз, гуьзел... Е. Э. Зав рахамир. Гила заз гьикӀдатӀан чидач... Е. Э. Суна, за ваз лугьун са чӀал. Я канаб течиз, я ипек, Я дишид чидач, я эркек... С. С. Гьарда вичикай хан ийида. Гьар са касдиз вичин кар хъсандиз чир хьун герек тирди хьиз, маса кас и кардин гъавурдик кутаз чир хьунни лазим я. З. Э. КУТВ-диз фена. Амма, зи хва, чир хьухь, хъуьруьн Гар туш гъарнихъ чкӀиз фидай. А. С. Хцихъ галаз ихтилат. Са кар чизва: патарив гва, мукьвалла, Эминан ваъ. ам Небидин къвалалла... М. Б. Эминан сурал. Синонимар: малум хьун, ашкара хьун. ☼ М. М. Гьажиева и уьлчме кьве жуьреда кхьизвай: чир хьун, чирхьун. Кил. М. Г. РЛС, ч. 86.
* чидач ман кӀус шаклувал къалурдай ибара. \[Гегьвер\]. - КӀел авун хъсан кар я лугьуда, чан руш; ви стхадини кӀел ийизва. Чидач ман, вун кӀелиз ракъурунал ви буба рази жедатӀа. Гь. Гь. Адетдин къармахра.