гл.; -вада, -уна; -ваз, -вазва; -у, -ван, -урай, -вамир; чӀугун тавун, чӀугун тахвун, чӀугун хъийимшр 1) рах., ни вуч гьинай гьиниз тухун, са чкадилай маса чкадиз гваз фин.... абуру ратӀрал кӀват хьайи кьван техил чпин кӀвалериз чӀугуна. А. А. Пад хьайи рагъ. Къуьнел квар алай рушар акурла, гьейран жемир абурал, гадаяр. Гьаятриз яд чӀугуникай фикир ая. С. К. Квар. 2) ни нелай-квелай са квелди ятӀани тӀарвал гун. ИкӀ лагьана са пуд пая ламран юрфарилай чӀугурла, айвандик квай мугьман япар хкажна акъвазна. Ф. Далалубегьли. Синонимар: ягъун, гатун. 3) ни нив са затӀунин заланвал-кьезилвал чирун (терезрал). Гьар гьи касди вичин рушакай хабар гайитӀа, гьадаз вичив чӀугур кьван къизиларни якъутар гуда лагьана пачагьди малумарна. Ф. Кесибдин хва Къагьриман. Синоним: алцумун. 4) ни вуч пӀузаррал фитӀинна сивиз са куьн ятӀани (пӀапӀрусдин, тембекдин, махоркадин) гум ракъурун. Ада пӀапӀрус чӀугун хъувуначир. А. Къ. Нехирбанни лекь. Са гум чӀугун хъувуна, ада къатӀ гадарна, А. Къ. Нехирбанни лекь. 5) нугъ., ни-куь вуч сивяй са гьихьтин ятӀани сесер акъудун. Вагьаб, явашдиз чӀиш чӀугваз, гьаятра къекъвезва, мал-къара ахтармишзава. М. В. Гьарасатдин майдандал. ПемпӀешан патав хтанвай. Адан сив къакъунзава ва ада, са къайгъуни авачиз, чӀиш чӀугвазва. М. В. Гьарасатдин майдандал. ПемпӀеша мад «ав» чӀугун хъувунач. М. В. Гьарасатдин майдандал. ПемпӀеша... РикӀин дарихвал рекьидалди къув чӀугван, и чуьллер гъамлу сузадив ацӀурин. М. В. Гьарасатдин майдандал. Шириндиз цӀур чӀугваз, къужадиз тавазвилер ийизва. Абасан кӀвачера аруш жезва. М. В. Гьарасатдин майдандал. 6) къелемдалди ва я рангаралди са вуч ятӀани (цӀар, шикил) чарчел арадиз гъун. Эгер заз, вилер акьална, абурун шикилар чӀугу лагьанайтӀа, за са четинвални авачиз и кар ийидай. А. Къ. Нехирбанни лекь. И йикъара Къиргъизистандин парламентди чӀалан гьакъиндай кьабулнавай цӀийи закон, президентди къул чӀугурдалай кьулухъ ам къуватда гьатда. ЛГ, 2004, 21 Л.
* бягьс \[женг! чӀугун, гьам \[дерт\] чӀугун, гьайиф(ар) чӀугун, жавабдарвилиз чӀугун, зегьмет чӀугун, кеф(ер) чӀугун, кьил чӀугун, кьулухъ чӀугун, ни чӀугун, язух чӀугун.