гл.; -да, -на; -из, -зава; -0, -ин, -рай, -мир; экъечӀ авун, экъечӀ тавун, экъечӀ тахвун, экъечӀ хъийимир 1) къен авай чкадай къецел гьерекатун. Гила хуьряй экъечӀдани, кӀвал гана? Е. Э. Заз сабур гуз. Йифекай кьвед-пуд сят кумаз муьгьмандин кӀваляй эхкъечӀнавай кьве кас экв ачух хьайила хуьруьз мукьва хьана. Н. М. Къизилдин хтар. Са акьван вахт алатнач, рак ахъа хьана, анай бегьем ахвар тахьанвай, бизар хьанвай яшлу дишегьли экъечӀна. М. В. Гьарасатдин майдандал. 2) агъада авай чкадай виневай чкадиз атун. Ша, экъечӀ, яр, вун утагъдиз, Цуькведивди дигай багъдиз. Е. Э. Акваз кӀан я. 3) чиляй набататар арадиз атун. Руша вичин кьил чуьхвена, яд цуриз экъична, къацу векьер экъечӀрай лагьана. Ф. Бибихатун. Яд тахьайла, никӀерни кьуразва, емишрин, майвайрин бегьерарни тӀимил къачузва, чурара, дугунра бегьем векьни экъечӀнавач. ЛГ, 2004, 15. VӀӀ. «Тумар экъечӀайла, аждагьанар ( девер ) къведай ва абуру никӀер алугардай. Абурун вилик пад кьун герек тир». Ф. 4) бедендай дуьздал акъатун. \[ Керекуьре Туркурович \] Вун яни ХаназирикӀ? Ваз спелар экъечӀнавани?! Спелар алай ХаназирикӀ. Ф. Б. Филиал. 5) малум хьун (варз, рагъ, гъед). Гила, рагъ тепедихъ чуьнуьх хьайила, алукьзавай йиф анжах никӀе къаршиламишун лазим я, тахьайтӀа, а йиф жегьилдикай бейкеф жеда, я варз, я са гъедни эхкъечӀ хъийич. М. В. Гьарасатдин майдандал.