прил. 1) вини дережадин. Къадалай виниз хпуькьвийрихъ кьилин ва 50-дахъ юкьван пешекарвилин образование ава. Ж. Гь. Лекьерин гьуьндуьрда 2) виридалайни маналу. Гьар шаирдал вичиз хас таж элкъвезва, Кьилин кар я чир хьун: вал таж ала - къун. А. Къ. Ибрагьимаз. Чи кьилин макьсадни милли чӀал ва культура цӀийи дережадиз акъудун патал кӀвалахун я. М. М. Кьибле пата гурзава. - За кхьей гзаф затӀариз дуьнья акунал зун шад я. Зи шиирар зи руьгьдин тарих, чарчел кхьенвай зи уьмуьр я. Анжах кьилинди гьикӀ лагьайтӀани, вилик кума. А. Къ. Дагъустан шаиррин уьлкве яз ама. 3) виридалайни чӀехи, важиблу. Кьилин приз - им гьар са мусурмандин мурад, исламдин кьилин шартӀарикай сад тир Меккедиз гьяждал фидай мумкинвал гун тир. Ассалам, 2001, No 2. Са вахтунда Махачкъалада кьилин куьче сад авай. ЛГ, 1999, 17. VӀ. 4) са тайин рекьяй пешекаррин кьиле авайди. ~ агроном, ~ инженер, ~ духтур. Юлдаш Айнар! Заз чиз ви гьални четин я. Аял кӀевиз азарлу я... Вун и жегъилдихъ галаз абурун хуьруьз фена кӀанда. Кьилин духтур. А. И. Духтур.
* кьилин герой \[игит\] ктаб., сущ. художественный эсердин асул мана ачухиз куьмек гузвай герой. Къейд авун лазим я хьи, са жерге маса халкьарин эпосрилай тафаватлу яз, лезги халкьдин эпосдин кьилин игит жергедин дагъвидин -чубандин хва я. Б. С. "Шарвили" гьикӀ арадиз атана? Гьавиляй адан, яратмишунрин кьилин игитарни асул гъисабдай зегьметчи инсанар ва тӀебиатдин векилар я. ЛГ, 2002, 15. V.
* кьилин къван сущ. кьейидан суран кьилихъ акалдай къван. Сурариз кьилин къванер расдай и кооперативдиз «Прогресс» тӀвар ганва. Гьич туькӀвей тӀвар туш. М. М. Лезги тӀвар алатӀа.