1. Necə hərəkət etmək, bir işi necə görmək haqqında təklif, göstəriş, tövsiyə. Həkim məsləhəti. Məsləhət vermək.
– [Şah buyurdu ki:] Sizi bir əmrdən ötrü məsləhətə çağırmışam, gərək haman xüsusda bir tədbir göstərəsiniz.
[Ağca] dünyagörmüş xanımların məsləhətilə bir dayə tutub, uşağı ona tapşırdı.
□ Məsləhət bilmək – olmasını, edilməsini müvafiq görmək, tövsiyə etmək.
Həkimlər [Səlimin] yerində tərpənməyini, durub asta-asta, köməkçi ilə gəzməyini məsləhət bilirdilər.
Məsləhət deyil – məsləhət görülmür, lazım deyil, tövsiyə edilmir.
…Bəlkə, heç Şeyxi narahat eləməyimiz məsləhət deyil?
Heç məsləhət deyil, əyləş, özünə bir-iki saatlığa bir məşğuliyyət tap.
Məsləhət etmək (eləmək) – 1) bax məsləhət görmək.
Düşəndə eylərlər sizə məsləhət; Xahi aşikarə, xahi də xəlvət. ;
2) bax məsləhətləşmək 2-ci mənada.
Noxudu bozbaşa salanda aşpazı qoyub, axund ilə məsləhət eləyirik.
Bilmək olmur nə məsləhət edirlər; Bəlkə basqın eyləməyə gedirlər?
Məsləhət qoymaq – məsləhətləşib qərara gəlmək.
[Səriyyə:] Bu gün anam, Həmzə və oğlanları məsləhət qoydular ki, məni Qurbana versinlər.
Məsləhət vermək (görmək) – necə hərəkət etmək, nə etmək haqqında birinə yol göstərmək, münasib bilmək, tədbir göstərmək, göstəriş vermək.
Məşədi Həsən uzaq getməyi məsləhət görmədi.
[Almaz:] Sən öz sağlam duyğunla mənə məsləhət ver.
2. Hər hansı bir məsələyə dair mütəxəssisin tövsiyəsi, göstərişi; konsultasiya. Məsləhət almaq. Məsləhət üçün mütəxəssisə müraciət etmək.
// Dərsi daha yaxşı mənimsəmək üçün müəllimin tələbəyə dərsdən əlavə köməyi, yardımı. Məsləhət saatı təyin etmək. Məsləhət günü.
