Abaddon (Rövşən Abdullaoğlu)

Abaddon — Rövşən Abdullaoğlunun 2018-ci ildə nəşr olunan 3-cü romanı.^[1][2]

Abaddon
Romanın VI nəşri
Müəllif	Rövşən Abdullaoğlu
Janrlar	intellektual, psixoloji, detektiv
Orijinalın dili	Azərbaycanca
Ölkələr	Azərbaycan
Orijinalın nəşr ili	2018
Nəşriyyat	Qədim Qala
Əvvəlki	Relslər üzərinə uzanmış adam
ISBN	ISBN 978-9952-8078-5-1

Məzmun[redaktə | mənbəni redaktə et]

Hadisələr İrlandiyada cərəyan edir. Məşhur "Titanik" gəmisini ilk və son səfərinə yola salmış sakit liman şəhərində baş verən silsilə qətllər bütün ölkədə əks-səda doğurur. Qatilin ələ keçirilməsi üçün yerli qarda (polis) əməkdaşları ilə yanaşı paytaxt Dublindən Kork şəhərinə ezam edilmiş məşhur müstəntiq və Amerikadan gəlmiş kriminal psixoloq da axtarış işlərinə cəlb edilir. Daha sonra oxucu çoxşaxəli süjet xətti boyunca qatilin cinayət axtarış komandasına açdığı mübarizəni təqib etməyə başlayır.

Əsər daha çox intellektual-psixoloji yönü ilə də diqqət çəkir. İnsanın bitməyən daxili savaşı, tənəzzülə və təkamülə aparan amillər demək olar ki, bütün obrazların üzərindən fərqli aspektlərdə açıqlanır. Burada qorxu və cəsarət, qorxu və sevgi hissləri bir bədəndə qarşılaşdığı zaman ortaya çıxan maraqlı davranış modelləri ilə rastlaşır, uşaqkən ilk qorxu qarşısında yenilmiş bir neçə fərqli insan həyatı görürük. Romanın bəzi hissələrində psixoloji zədələr qarşısında müdafiə mexanizmini işə salmış insan şəxsiyyətinin nələrə qadir olduğundan bəhs edilir.

Vətənə, milli-mənəvi dəyərlərə bağlılıq və bunun fonunda Tanrıya, dini inanclara fərqli münasibət (İrlandiya xalqı dini etiqadlara, müqəddəs şəxsiyyətlərə bağlılığı ilə tanınır) əsər boyunca ana xətti müşayiət edərək müxtəlif rakurslardan işıqlandırılır. Sonda mozaikanın bütün daşlarını bir yerə toplayan müəllif maraqlı bir təsvir yaratmaqla əsər boyu oxucunu düşündürən tapmacanın açarını təqdim edir.

Nəşr[redaktə | mənbəni redaktə et]

Kitab 2018-ci ildə Bakıda Qədim Qala nəşriyyatında "intellektual psixoloji detektiv" silsiləsində 384 səhifədə 60x84 ölçüsündə çap edilib. 2021-ci ilə qədər 6 dəfə təkrar nəşr edilib. Roman həmçinin rus^[3] və ingilis dillərinə də tərcümə edilib.^[4]

Satışı[redaktə | mənbəni redaktə et]

12 may 2018-ci ildə kitab ilk dəfə nəşr olunandan sonra cəmi bir neçə saat ərzində tamamilə satılaraq qurtarıb. "Abaddon"un ilkin nəşri topdan və pərakəndə halda olmaqla birlikdə cəmi 3-4 saata alınaraq bitib. Əvvəlcədən onlayn qaydada sifariş edən alıcıların kitabları isə tədricən ünvanlarına çatdırılıb.^[5][6][7]

Beynəlxalq ədəbi qurumların rəyləri[redaktə | mənbəni redaktə et]

Self-Publishing Review:

“Bu detektiv əsər möhtəşəm nəsr nümunəsidir... “Abaddon” psixoloji trillerdən daha artığıdır – burada mədəni önyarğılar, psixi sağlamlıq, hakimiyyət uğrunda mübarizənin təbiəti, təhrif olunmuş əxlaqi cizgilər, incəsənət, mifologiya, elm və bir çox başqa sahələrə də toxunulur. Bu qeyri-adi hekayəni, həqiqətən, oxumağa dəyər. Səhifələr çevrildikcə bizi cəhənnəmin təbəqələrinə daha da qərq edən “Abaddon” daim yenilikçi və sərrast söz ustasından növbəti təsirli yaradıcılıq nümunəsidir”.

BookLife Prize:

“Süjet orijinal, üslub çalarları arasındakı keçidlər xeyli unikaldır. Nəsr sadə dillə qələmə alınıb, İrlandiya təbiətinin təsvirləri çox gözəldir”.

Kirkus Reviews:

“Qətllərin qorxunc təbiəti bu janrın pərəstişkarlarına hakim kəsilərək onları öz ardınca sürükləyəcək”.

IndieReader:

“İlk cümlələrdən sona qədər oxucunu bir an belə cazibə dairəsindən buraxmayan gərginlik və sirr torları hörən müəllif parlaq bir psixoloji dram nümunəsi yaradıb”.

Lesli Cons “Readers' Favorite” üçün:

“Əsərin süjeti çox cəlbedicidir və elə ilk fəsildən diqqətinizi özünə bənd edəcək. Fövqəladə ustalıqla qələmə alınmış qətl səhnələri çox canlı alınıb. Müəllifin hər iki hekayə xəttini bu qədər rahatlıqla bir araya gətirməsinə heyran qaldım. Süjetin dolambacları unikal, sonluğu isə mükəmməldir. Abaddon parlaq və unudulmaz bir əsərdir”.

Həmçinin bax[redaktə | mənbəni redaktə et]

• Rövşən Abdullaoğlunun biblioqrafiyası

İstinadlar[redaktə | mənbəni redaktə et]

Xarici keçidlər[redaktə | mənbəni redaktə et]

• "Abaddon" ( (az.)). qedimqala.az. 2018-08-25 tarixində arxivləşdirilib. İstifadə tarixi: 2018-08-25.
• Zərif Nisə. "Rövşən Abdullaoğlunun "Abaddon" romanı satışda niyə rekord vurur? - Maraqlı izah" ( (az.)). milli.az. 2018-05-21. 2018-05-30 tarixində arxivləşdirilib. İstifadə tarixi: 2018-05-29.
• "Rövşən Abdullaoğlu ilk dəfə `Abaddon`dan danışdı - VİDEO" ( (az.)). faktxeber.com. 2018-04-25. 2018-05-30 tarixində arxivləşdirilib. İstifadə tarixi: 2018-05-30.