Eldar Həsənov (hüquqşünas)

Bu məqalədəki məlumatların yoxlanıla bilməsi üçün əlavə mənbələrə ehtiyac var. Lütfən, məqaləyə etibarlı mənbələr əlavə edərək onu təkmilləşdirməyə kömək edin. Mənbəsiz məzmun problemlər yarada və silinə bilər. Problemlər həll edilməmiş şablonu məqalədən çıxarmayın. Daha ətraflı məlumat və ya məqalədəki problemlərlə bağlı müzakirə aparmaq üçün məqalənin müzakirə səhifəsinə diqqət yetirə bilərsiniz.

Bu məqaləni vikiləşdirmək lazımdır. Lütfən, məqaləni ümumvikipediya və redaktə qaydalarına uyğun şəkildə tərtib edin.

Eldar Hümbət oğlu Həsənov (10 oktyabr 1955, Laçın, Kəlbəcər rayonu) — Azərbaycanın sabiq baş prokuroru, Azərbaycan Respublikasının Serbiya Respublikasında, Monteneqroda və Bosniya və Herseqovinada fövqəladə və səlahiyyətli səfiri, hüquq elmləri doktoru, II dərəcəli dövlət ədliyyə müşaviri.

Eldar Həsənov
Azərbaycan Respublikasının Bosniya və Herseqovinada fövqəladə və səlahiyyətli səfiri
28 mart 2013 – 17 avqust 2020
Sonrakı	Vilayət Quliyev
Azərbaycan Respublikasının Rumıniyadakı Fövqaladə və Səlahiyyətli Səfiri
28 mart 2001 – 28 mart 2013
Birləşmiş Millətlər Təşkilatı Narkotizm, Alkoqolizm və digər asılılıqlar üzrə Beynəlxalq Proqramının Türkiyə və MDB ölkələri üzrə Koordinatoru
sentyabr 2000 – mart 2001
Azərbaycan Respublikasının Baş Prokuroru
22 mart 1995 – 21 aprel 2000
Əvvəlki	Əli Ömərov
Sonrakı	Zakir Qaralov
Azərbaycan Respublikası Baş Prokurorunun birinci müavini
9 noyabr 1993 – 22 mart 1995
Baş prokuror	Əli Ömərov
Sonrakı	İsa Nəcəfov
Azərbaycan Respublikası daxili işlər nazirinin birinci müavini
1993 – 25 may 1993
Əvvəlki	Məmmədağa Cəfərov
Sonrakı	Qabil Məmmədov
Azərbaycan Respublikasında İnterpolun Milli Mərkəzi Bürosunun rəisi
1992 – 1993
Əvvəlki	Vəzifə təsis edildi.
Gəncə Şəhər Polis İdarəsinin rəisi[1]
1990 – 1992
Əvvəlki	Zahid Dünyamalıyev
Sonrakı	Nadir Abbasov
Şəxsi məlumatlar
Doğum tarixi	10 oktyabr 1955(1955-10-10) (69 yaş)
Doğum yeri	Laçın, Kəlbəcər rayonu, Azərbaycan SSR, SSRİ
Fəaliyyəti	diplomat
Rütbəsi	II dərəcəli dövlət ədliyyə müşaviri
Təltifləri

Eldar Həsənov Azərbaycanın ən füsunkar rayonlarından biri olan Kəlbəcərin Laçın kəndində müəllim ailəsində anadan olmuşdur. 1972-ci ildə kənd orta ümumtəhsil məktəbini bitirdikdən sonra Dövlət Politexnik İnstitutunun avtomatika və hesablama texnikası fakültəsinə daxil olmuş, 1977-ci ildə ali təhsilini fərqlənmə ilə başa vuraraq elektronika mühəndisi ixtisası almışdır.^[2]

1983-cü ildə SSRİ DİN Akademiyasını hüquqşünas ixtisası üzrə bitirmişdir. Uzun müddət Azərbaycan Respublikasının hüquq-mühafizə orqanlarında müfəttiş, baş müfəttiş, cinayət-axtarış şöbəsinin rəis müavini və rəisi, Bakı şəhəri Nizami rayonunun və Gəncə şəhərinin daxili işlər şöbəsinin rəisi, daxili işlər nazirinin müavini, baş prokurorun müavini və baş prokuror vəzifələrində çalışmışdır.^[3]

Eldar Həsənov 21 aprel 2000-ci ildə səlahiyyət müddətinin bitməsi ilə əlaqədar Azərbaycanın prezidenti Heydər Əliyev tərəfindən baş prokuror vəzifəsindən azad olunmuşdur.^[4][5] Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda 25 kitab (son 2 kitabı: Rumıniyada könüldən diplomatiya və Balkanların dostluq körpüsü boyunca), dərslik və dərs vəsaitinin, eləcə də 170-dən çox elmi və publisistik əsərin müəllifidir.

• Professor, hüquq elmləri doktoru
• Rumıniyanın Ovidius, Babeş-Bolyay və Andrey Şaquna Universitetlərinin fəxri doktoru
• Serbiya Kral Akademiyasının üzvü

Cənub-Şərqi Avropada Əməkdaşlıq Təşəbbüsü Təşkilatının trans-sərhəd cinayətkarlığa qarşı mübarizə üzrə regional mərkəzində Azərbaycan Respublikasının rəsmi nümayəndəsi olmuşdur.

2001-ci ilin mart ayında Azərbaycan Respublikasının Rumıniyadakı səfiri təyin edilmiş, onun üçün yeni olan diplomatik sahədə fəaliyyətə başlamışdır. Rumıniyadakı səfirliyi Azərbaycan Respublikasının Cənub-Şərqi Avropa regionunda ilk səfirliyi olmuşdur. Bu illər ərzində hər iki ölkə arasında siyasi sahədə əməkdaşlıq, çoxtərəfli münasibətlərdə daimi dəstək, ikitərəfli əməkdaşlıq əlaqələrində isə qarşılıqlı anlaşma və etimad daha da artmış və möhkəmlənmişdir. Azərbaycan Respublikası və Rumıniya arasında səmimi və şəffaf dostluq, əməkdaşlıq münasibətləri strateji tərəfdaşlıq səviyyəsinə çatmışdır. Yüksək səviyyəli qarşılıqlı səfərlər daha da intensiv xarakter daşımağa başlamışdır. Bir sıra yeni mühüm sənədlər və sazişlər imzalanmışdır.

Səfir E. Həsənov fəaliyyətində hər iki xalqın bir-birinə daha da yaxınlaşdırılması məqsədilə elmi, mədəni əlaqələrin inkişafına xüsusi diqqət yetirmişdir. Belə ki, 2001-ci ildə səfirliyin təklifi və dəstəyi ilə Rumıniya-Azərbaycan Dostluq Cəmiyyəti və Azərbaycan-Rumıniya Mədəniyyət və Gənclər Assosiyasiyası yaradılmışdır və ikitərəfli elmi, mədəni əlaqələrin daha da dərinləşdirilməsi məqsədilə çox aktiv fəaliyyət göstərməkdədir.

2001-ci ildən səfir kimi fəaliyyətə başladıqdan sonra Azərbaycan Respublikası ilə Rumıniya arasında siyasi, iqtisadi, elmi, təhsil, mədəni sahələrdə dostluq, əməkdaşlıq münasibətlərinin daha da möhkəmləndirilməsi və narkotizm, terrorizm, mütəşəkkil cinayətkarlığa qarşı barışmaz mübarizə aparılmasında böyük töhfələr vermişdir.

Həmçinin E. Həsənov Azərbaycanın Serbiya, Monteneqro və Bosniya və Herseqovinadakı səfiri kimi fəaliyyət dövründə Azərbaycan Respublikası ilə bu ölkələr arasında bütün sahələrdə əlaqələr yüksələn xəttlə inkişaf edərək starteji tərəfdaşlıq səviyyəsinə çatdırılmışdır.^[6]

Azərbaycanın ("İgidliyə görə" medalı, "Qanunun və ictimai asayişin təmin edilməsində xidmətlərinə görə" medalı, "Azərbaycan bayrağı" ordeni), Rumıniyanın ("Xidmətlərə görə" Böyük Xaç Kavaleri ordeni), Serbiyanın ("II dərəcəli Serbiya bayrağı") dövlət mükafatları və medalları ilə təltif olunmuşdur.

Rus, türk, ingilis və rumın dillərini bilir.

Evlidir, 3 övladı var.

• 1972–1977 — Azərbaycan Politexnik İnstitutunun avtomatika və hesablama texnikası fakültəsi;
• 1977–1990 — Azərbaycan Respublikasının hüquq-mühafizə orqanlarında müfəttiş, baş müfəttiş, cinayət-axtarış şöbəsinin rəis müavini və rəisi, Bakı şəhərinin Nizami rayonunun daxili işlər şöbəsinin rəisi;
• 1990–1992 — Gəncə şəhərinin daxili işlər şöbəsinin rəisi;
• 1992–1993 — İnterpolun Azərbaycandakı Milli Mərkəzi Bürosunun ilk rəisi;
• 1993 — Azərbaycan Respublikasının Daxili İşlər Nazirinin birinci müavini;
• 1993–1995 — Azərbaycan Respublikası Baş Prokurorun birinci müavini;
• 1995–2000 — Azərbaycan Respublikasının Baş Prokuroru;
• 2000 — Azərbaycan Pedaqoji Universitetinin müəllimi;
• 2001 — Narkotizm, Alkoqolizm və digər asılılıqlar üzrə Beynəlxalq təşkilatın və BMT proqramlarının Türkiyə və MDB ölkələri üzrə əlaqələndirici;
• 2001–2013 — Azərbaycan Respublikasının Rumıniyadakı Fövqəladə və Səlahiyyətli Səfiri.
• 2013–2020 Azərbaycan Respublikasının Serbiya Respublikasında, Monteneqroda və Bosniya və Herseqovinada fövqəladə və səlahiyyətli səfiri^[7]

Beynəlxalq və Azərbaycan mətbuatında Eldar Həsənov haqqında çox sayda yazılar və araşdırmalar dərc edilib.^{[6][8][9][10][11][12][13]} 2020-ci ilin avqustun 13-də Eldar Həsənov vəzifə səlahiyyətlərindən sui-istifadə etmə, mənimsəmə, rüşvət alma faktlarına görə cinayət məsuliyyətinə cəlb edilərək həbs edilib. Maliyyə yoxlamaları zamanı Azərbaycan Respublikasının Serbiya Respublikasında, Monteneqroda, Bosniya və Hersoqovinadakı səfiri Həsənov Eldar tərəfindən xeyli miqdarda büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edilmişdir.^[14] Həbs olunduqdan sonra 17 avqust 2020-ci ildə səfir vəzifəsindən geri çağırılıb.^[15]

Bu məqalədəki istinadlar müvafiq istinad şablonları ilə göstərilməlidir.