араб, сущ.; -ди, -да; -ар, -ри, -ра 1 ) хьайи ва я жезвай хажалат агатна атанвай гьал. Гьайифди лап кана сивер акъатна. Е. Э. Гачал, гьей!... Гьайиф гьатнава рикӀе. Ахьтин гьайиф! Вири уьмуьр вилик хкизвай, вири акур кьван шикилар, гьам тӀебиатдин, гъам инсанрин, гъам къисметрин шикилар тупӀалай ийиз тазвай гьайиф. М. С. Буьркьуьди. 2) хьайи, алатай кар, агьвалат рахазвайдаз кӀамайди къалурдай, сказуемидин ролда авай гаф. Гьайиф, уьмуьр хьана кьуьзуь. Е. Э. Алагуьзли. Гьайиф, уьмуьр икӀ бада физ, - Межлисдин чирагъ я ханум. Е. Э. Ханум. Гьайиф, лекьрек ктканач, ам яргъаз акъатнавай, -лагьана цавуз килигна Даниял. А. Сайд. Гьуьндуьшкадин шараг.
* гьайиф атун гл., вуж-вуч низ гьайифдин гьиссини кьун. Ам ваз гьайифни атанай, Лейли ваь. Лейли Нежефаз тӀвар янавай руш яз хейлин вахт тиртӀани, ваз ам гьайиф атаначир. М. С. Буьркьуьди. За, я экуван сагъвал, я къуватар гьайиф татана, зи амай уьмуьрни михьиз чи чӀехи, бахтавар Ватандиз кьуллугьуниз акъудда. С. С. Жувакай ихтилат. Гьайиф татана чӀугур зегьмет вичин. А. Ф. КьатӀ-кьатӀ авур зунжурар. Гьайиф къвемир ваз ви чан, ви къуват, Халкьдин, Ватандин вафалу рекье! Ш. Т. Абад ая, дуст, чи азиз ватан! За пайзава вахт кӀусни гьайиф татана. А. Ал. Конститутция. Зегьмет пучна, гьайиф текьвез рекьериз, Са вуч ятӀан тада зани чилел мад... Д. А. Рекьиз. Синоним: язух атун.
* гьайиф хьун гл., вуж-вуч гьайифдин гьиссиник хьун. Дадашан чина амай са тӀимил рангарни атӀана, адаз гьайиф хьана. А. Ф. Бубадин веси.
* гьайиф(ар) чӀугун гл., ни нин-куьн дертлу гьал гьиссун. - Эй, лагьана гьайиф чӀугуна за. А. Ф. Лянет. Са кьадар гьайиф чугурдалай кьулухъ чун са геренда секин хьана. А. Ф. Лянет. За иниз атана лугьуз рикӀяй гьайиф чӀугуна. А. Къ. Чеченрин межлис Гила вуна гьайифар чӀугвазва. М. С. Буьркьуьди.
* гьайиф хьи арал. гьайиф чӀугуналди лугьудай фикирдин вилик ишлемишдай ибара. Гьайиф хьи, и ширин вахтар, и наз гудай йикъар яргъа л фенач, фад куьтягь хьана. А. И. Самур,. Гьайиф хьи, законар чӀурунихь галаз милицияди ва прокуратуради чӀугвазвай женг гьамиша активный характер авайди жезвач. К, 1988, 27. XӀӀ. Гьа икӀ, олимпиада сятдин ругудаз, гьайиф хьи, анжах виридан патай наразивилелди куьтягь хьана. ЛГ, 2002, 24. ӀV.