сущ., текв.; -ди, -да сабур, секинвал, сабурлувал. - Мухлисата вучзава? - жузуна Аслана дидедивай, эхир кьарай кьун тавуна 3. Э. Муьгьуьббатдин цӀелхем. Са варз инлай вилик са чӀуру хабар хьана хъел кьунвай Селиматавай гила кьарай кьаз хьанач. Ада вилер хкажна жузуна 3. Э. Муьгьуьббатдин цӀелхем. Анай экъечӀуник кваз адаз мелев эгечӀдалди кьарай хуьз тежез къерехрив гвай векьер-кьаларал дергесрин хцивал ва чпин гъилерин къуват ахтармишзавай гадаяр акуна. Б. Гь. Заз эвера. Бе-ес, дидедин, дишегьлидин кьарай авачир рикӀ я гьа-а! Ж. Гь. Дидедин кьарай авачир рикӀ.
* кьарай атӀайди обр. дуствилин алакъа яр авайдахъ галаз рахадайла, ишлемишдай ибара. - Ваз абур Цавандай тирди ахварай акунани, яда? - мадни цӀай кутазва Даша. Яз хьайитӀани, садра руш ганач лугьуз гьар акатай чкадал гьикьван русвагьда на абур, кьарай атӀайди? М. Б. Спелар.
* кьарай атӀун гл., нин секиндиз акъвазиз тахьун, секинсузвилин гьисс гужлу хьун. Сефил яз ава зун, атӀана кьарай, БалкӀан гьикӀ акъудин чинеба цурай? С. К. Яран сувариз.
* кьарай атӀун тав(ур) < кас > обр. - Я кьарай атӀун тавур кас, зурба кьве вацӀ - Волгани Дон какахьайла, затӀни чӀур тахьай, ( гена хъсан хьайи ), ваз эрекьни перцовка какахьуналди вуч жез кичӀезва? Б. Гь. Заз эвера.
* кьарай татун гл., низ сабурлу хьана акъвазиз тахьун. Рустамаз эхир кьарай атанач... Ф. Рустам Зал. Гъиле кар авачиз кьарай къведачир. А. Ф. КьатӀ-кьатӀ авур зунжурар. Я стха, на а яргъийрикай вучзава, куьрелди лагь ман, - кьарай къвезвач Магьсумаз. Н. Ш. КӀвалин референдум. КӀвалах дик квачиз кьарай текъведай Сейфуллагьдиз темпелвал квай ва кӀвалах ийиз тежезвай инсанар хуш тушир. С. Муслимов. ЦицӀигъ-наме. А вахтар рикӀел хтайла, зун ажебан жеда: инсанар аквадай чкайра кьарай къведач... М. Б. Шапка.