сущ.; -у, -а; -ар, -ари, -ара гьайвандин кӀвач. Гагь деведиз кӀанда кӀасиз, Гагь ламраз вун кӀурув ягъиз. С. С. Урусатдиз. Адан гъил агакьунни сад хьанай, калин кӀур цавуз акъатунни. Б. Гь. Заз эвера.
* кӀур гун гл., ни низ-квез 1) кӀвачерик кутуна тӀебии гьалдай акъудун. Йифиз тевледа авай ламари, и «махорка», векьер хьиз хьана, неда, амайдазни кӀур гуда. X. Т. Чи накьвадиз, чи девлетдиз нетӀешри кӀур гун, чун икӀ вара-зара авун чна эхдач. Гь. Къ. Четин бахт. 2) гьич са фикирни тагана, инкар авун. Вичин гафунал мягькем тиртӀа, гьелбетда, ада вири куьгьне адетризни, дидединни бубадин рахунризни кӀур гудай. Н. А. Кьве рикӀин хиялар. Гила вуна мехъерар ийидани, дуст? гьа дидеди це лагьанвайди вуна гъидани? Жуван намусдизни муьгьуьббатдиз кӀур гун дуьз туш, дуст. А. Р., Я. Я. Хендедадин мехъер. Чун кисайтӀа, лап чируьгьдиз кӀур гуда, Ялтах рахаз, чун къвазайтӀа, секиндиз. X. X. «Чи чилив гва дегьзамандин рехивал».
* кӀурар хкадарун гл., ни авур теклифдал нарази яз гьарай-эвер авун. Амма са карди зун секин тазвач. Мехъерикай рахайла, гьамиша кӀурар хкадарзава. А. Р., Я. Я. Хендедадин мехъер.