сущ.; - па, - па; - пар, - пари, - пара 1) эркекдиз акси жинсинин, вичи аялар хадай ва абуруз хурудай нек гана чӀехи ийидай инсан. Гьич тахьай кьван гзаф атанвай папар, КӀватӀ хьанай гъвечӀи-чӀехи ва руш аял. А. Ф. КьатӀ-кьатӀ авур зунжурар. Къав кӀевириз,. шифер ягъиз, Папар жезва кӀвал сувагъиз, Залан кӀвалах уртах ийиз, Ажеб регьятвилер жеда. С. Лезги мехъер. Синоним: дишегьли. 2) са хизандин кьил кутун патал итимдиз некягьнавай диши инсан. Гьич са касдиз кьве паб тахьуй дуьньядал. Е. Э. Кьве паб. Са паб гъун важиб, герек я бендедиз. Е. Э. Герек туш. Паб кьена ялгъуз хьайила, Виниз кар агъуз хьайила... Межлисда зи тӀвар амач кьван. С. С. Марият кьена хендеда хьайила. Айиб туш папахъни тахьайтӀа цамар, Айиб я ачух чин, жигер тахьайтӀа. А. С. Ша, дустар! Лезгидиз герекди са паб, вад аял, са кесиб кӀвал ва са гъвечӀи къуллугъ я. 3, Р. Веси. Я паб,... им чӀехи мурад тушни, жуваз хва хьана, хва чӀехи хьана, адан мехъер, межлис акун. А. Муграгъви. Адалатдин арха.
* паб-аял сущ. са хизанда авайбур вири санлай. Вуна мидя кьуналди къе архадай, Паб-аялдиз къалуруналди буба хьиз, Эхир раиж жеда ви рехъ туба хьиз, Ви хва пака гьи чин алаз рахада? X. X. «Чи чилив гва дегьзамандин рехивал». Ада, виридаз хьиз, Севзиханазни гьа сад хьтин жавабар ганай: «Кеф- гьал пис туш... пабаял вири сагъсаламат я». А. Къ. Нехирбанни лекь.
* паб гъун ( къачун ) гл., ни низ уьмуьрдин юлдашвиле кӀани дишегьли жуван кӀвализ гъун. Паб тагъана яшамиш жедайди туш, - атӀуз-атӀуз лугьузва Гьайваза, вичин стхадин чинилай вилер алуд тийиз. М. В. Гьарасатдин майдандал. Кьвед лагьай паб хкидай ихтияр авайтӀа, за ам гьикӀ хьайитӀани жагъурдай З. Къ. ШейтӀандин веледар. Бахтсузвал яни, тахьайтӀа кьисмет, Гъайи-гъайи паб кьена са касдин, Абурун шалар куьрсарун адет Хьанвай цлакай, лишан яз ясдин. Ирид лагьай паб хкана тадиз, КъекъвезвайтӀани гъилеваз кӀекӀец... К. К. Яд атӀай регъв. Синоним: эвленмиш хьун.
* паб-гъуьл сущ. са хизандин кьиле авайбур. Паб-гъуьл хьайтӀа, тежез хьайитӀа гьуьрметар. Квез герек я мад а мехъер, зегьметар. С. С. Пис папаз.
* паб рахкурун гл., ни паб тир дишегьлидихъ галаз санал яшамиш жез амукь тавун.
* паб тӀалакьдин кьил сущ. папал кьадай кьин. Хуьре нашиз гъисабзавай АнтӀила са сеферда кимел, вичелай акьуллу кас авач лагьана, паб тӀалакьдин ва кьуд каламдин кьин кьуна. Къ. Къайибханов. АнтӀилан кьин.
* папаз кӀан хьайитӀа, ламракай итим ийида мисал 'гъуьл тербияламишунин карда патан къуват еке я' манадин мисал.