сущ.; -или, -иле; -илер, -илери, -илера рафтар, алакъа авай гьал. Зелфидинни учительницадин арада гъеле са ахьтин мукьва рафтарвал тайин хьанвачир. А. А. Умуд. Иллаки гатфариз вири и гьерекатриз ажайиб кесерлувал хас жедай, гуя тӀебиатда алукьнавай и гуьзел бередиз атирни, везинни, дигайвал гузвайди и бахтавар инсанрин ачух рафтарвилер я. М. В. Гьарасатдин майдан. Нина муаллимдин инсанвал, регьимлувал, виридахъ галаз адан хуш рафтарвал я. ЛГ, 2000, 20. VӀӀ. Лугьумир кьван, Юдинанни чӀехи камалэгьли Лев Толстоян арада хуш рафтарвал ва дуствал аваз гзаф йисар тир. К, 1988, 22. ХӀ. Вирибурухъ галаз чна хуш рафтарвилин алакъаяр хуьзва. Д. Шерифалиев. Къабил бубадихъ галаз гуьруьш. Синоним: алакъалувал.
* рафтарвал авун гл., ни нихъ галаз алакъалувал авун. Мехъер алатай пакамахъ, вичин гъуьлуь ам кӀваляй чукурайдини хъсандиз чизватӀани, Селминаза адахъ галаз инал са жуьредин рафтарвал ийизва. М. В. Гьарасатдин майдандал. Велимет куьчейриз экъечӀзамач. Адаз инсанрихъ рафтарвал ийиз кӀамач. М. В. Гьарасатдин майдандал. Вичин гьал хъсан хьайила. ада захъ галаз ашкъидивди, хайи веледдихъ галаз хьиз, рафтарвал ийиз хьана. А. Э. Шаирдин тарсар. Синоним: алакъалувал авун.
* рафтарвал хьун гл. алакъаяр хьун. И кьве патан арада, - фикирзавай жеди лекьре, - садрани баришугъвал, рафтарвал хьун мумкин туш. М. В. Гьарасатдин майдандал.