Dilimizdə açıq-saçıq sözü var, “hər şeyi olduğu kimi bəyan etmək” mənasında işlədilir. Saçmaq feili “сыпать”, “рассыпать” mənalarında qədim mənbələrdə mövcud olub. Səpmək, sıçramaq sözləri də həmin saçmaq kəlməsi ilə eyni kökə malikdir. Açıq-saçıq kəlməsi hərfi mənada “açmaq və yaymaq” (səpmək) deməkdir. Qədimdə -ğır şəkilçisi “az qaldı ki, baş versin” mənalı sözlər düzəldib: Su saçğırdı cümləsi “az qaldı ki, suyu sıçratsın” demək olub. Saçğır kəlməsi tədricən sıçramaq şəklinə düşüb (səkmək sözü də buradandır). (Bəşir Əhmədov. Etimologiya lüğəti)