араб, сущ.; -ди, -да; -ар, -ри, -ра 1) вирида чпин яшайишда, дуланажагъда амал ийизвай, къанун хьана кьиле тухузвай са гъихьтин ятӀани кар, кӀвалах. Гьич тахьайтӀа, чаз мелез къведай хъсан адет ава. А адет халкьди бажагьат чӀурда. Гь. Къ. Четин бахт.. Эй Сулейман, ахьтин папар Жедай адет я мад санбар. С. С. Кьулан СтӀалрин кустарнада. Аку и лезгийрин адет: Юзбаши сад, цӀуд комитет. С. С. Чи гьар са кар къешенг хьана. Бубайрин хъсан адетар ян тагана кьиле тухун чи буржи я. Къ. М. Дагъларин деринрин булахар. Сусан тупӀухъ тупӀал акалдай чӀавуз Мегьмет-Эмина чаз ихьтин са адетдикай хабар гана: туьркверин арада жегьил касдиз свас це лугьудайла, адан тупӀухъ тупӀал акализ я диде, я вах ва я маса мукьва кас герек я. Гъ. Садыкъи. Истамбулдиз сиягьат. Лезгийрихъ са хъсан адет авайди я. Эгер са касдиз ви са затӀ лап бегенмиш хьанватӀа, ам адаз багъишда. С. Зазни хуш я ви шаламар. Лезгийрихъ са адет ава: жегьилди, Руш жагъайла, вахт атайла мехъеррдай, - Ядни вучиз гъизвач лугьуз къайиди, Квар къачуда, гадарда ам пенжердай. М. Б. Кварар. 2) хесет. Дегиш хьанва адетар вуч, Садакай сад къурвах хьанва... Ф. Н. Хьел къуьнелай... Вуж атайтӀан, гъадан адет кьуна на, Жуван адет, эдеб гьина туна на ! Н. Самури. Лезги, вавай жузан за Синоним: къайда.
* адет патал нар. чарасузвал авачиз, са гъихьтин ятӀани вичин гьараздалади, гьахъ-гьисаб дуьз хьурай лагьана. Рекьяй физвай фекьи инал капӀ ийиз акъвазна. КапӀ авурдалай Кьулухъ, ада, чӀана адет патал, чи ихтилатриз шериквал авуна. С. С. Жувакай ихтилат. Колхоздин ревкомиссияди Сулейманни адет патал чпихъ галаз тухуда. И. В. Чирхчир. Амма гьелелиг адаз цӀийидахъ галаз алагъ-салагъ туькӀуьриз кӀанзавачир. ГьакӀ адет патал «хвашгелди» лугьудай тегьерда гададиз са вил яна, ам вичин иеси уьтмиш хьайи патахъ элкъвена. Б. Гь. Заз эвера.
* адет яз арал. къайда хьанвайвал. А чӀавуз, адет яз, ана колхозди са къад-яхцӀур гектарда техилар цазвай. 3. Э. Зардияндин дустар. Адет яз, диде-бубайриз, чпин веледрин тариф авурла, хуш жеда.... Б. Гь. Заз эвера.