сущ.; -ди, -да; -ар, -ри, -ра дараматда кудай цӀалай къарагъдай гум фин патал туькӀуьрнавай чка. КилигайтӀа, яргъал са гурмагъдай гум акъатзава. Ф. КӀватӀашдин мах. Заводдин гурмагъ язва, ЧукӀуриз гьарнихъ гумар. А. Ф. Зарбачи Гьасан. Гурмагъда гум къалин хьанвай. А. А. Умуд. И рувалай чи кӀвализ килигайла, чаз чи касни авачир ужагъдин гурмагъдай кӀапӀал-кӀапӀал гум акъатиз акунай... Къ. М. Хайи чилин таватар.
* гурмагъдин гум атӀун гл., нин четин гьалара гьатун, рекьидай гьалдиз атун. Вахт хьуртамиш хьана залум -АтӀана зи гурмагъдин гум. А. Ал. Къула жив.
* гурмагърилай гум кими тахьурай, я Ребби межд. " яргъалди уьмуьрар хьуй" манадин гафар. Сада садаз дуьа ийидайла, дагъвийри лугьуда: "Куь гурмагърилай гум кими тахьурай, я Ребби ". Ж. Гь. Лекьерин гьуьндуьрда.