сущ.; - цӀи, -цӀе; - ар, -ари, -ара 1) чарчел сад-садан гуьгъуьналлаз гафар кхьенвай са жергедин мензил. И шиирар Историядин, чӀаларин ва литературадин институтда шаирдин архивда ава. Вири ина 500 цӀарцӀихъ агакьна 12 шиир ава. М. М. Гь. СтӀал Сулеймана азербайжан чӀалал туькӀуьрай шиирар. Зун шиирдихъ къекъвезвай. Дафтарар ахьайиз за цӀарара вил экъуьрзавай. А. Къ. Нехирбанни лекь. Гафунин кьатӀ са цӀарцӀяй маса цӀарцӀиз слогралди акъудда. Гь. Р. Рамалданов, А. А. Ражабов. Лезги чӀал, 1992. 2) куьч. шиир. Къуй зи цӀарцӀи, симини хьиз ток авай, Гъурай элдиз берекат. А. С. Зи кӀвачикай... 3) ктаб. къайда, политика. -. Ибур вири, товарищ Шахмарданов, партиядин цӀарцӀелай элячӀун я. Зун коммунист я, за авайвал лугьузва. А. А. Лезгияр.
* цӀар илитӀун гл., ни квелай яргъалди къекъуьн. Мад фена Азраил Дагъларилай цӀар илитӀиз. С. Пехил дустар себеб яз. Чун агъадалди фирдавай Цавдарни чахъ галаз агъуз эвичӀзавай хьиз авай. Ада гила Тенфе бадедин кӀвалерилай цӀар илитӀнавай. А. Къ. Нехирбанни лекь. Лап эхирдай Шамсудин, Саид, Нияз экъечӀна. Алидарни абурун гуьгъуьна гьатна. Вилик квайбуру са шумуд куьчедал цӀар илитӀна. М. Садикь. Дуст.
* цӀар чӀугун гл., ни 1) квекай кхьенвай са гафунин ва я са шумуд гафунин кӀаникай цӀар туху н. - Суал чна икӀ къалурна: "Квез низ кӀвалин ЧӀехиди вуж хьана кӀанзава?" Бюллетендин са пата "буба", муькуьна "диде" гафар кхьенвай. ТакӀандалай цӀар чӀугу. Н. Шихнабиев. Референдум. 2) квелай кхьенвай са гафунин ва я са шумуд гафунин винелай цӀар тухун (наразивилин, такӀанвилин лишан яз). Муьгьуьббатдин гафарилай чӀугвамир вуна цӀар, Уьмуьрдин яру рангар гьич лацу жез тахьуй. С. А. Чир хьухь! Синоним: чӀурун.
* цӀарцӀе гьатун гл., вуж чирвал артух хьун, вердиш хьун. Сифте вахтара ваз за куьмек гуда, за. Ахпа къвез-къвез вунни цӀарцӀе гьатда. Мад ваз вуч кӀанзава. Я. Я. С фурун вакӀар.
* цӀарцӀин гьарф сущ. чӀехи гьарф.