прил.; кьве касдин, еридин, чкадин юкьва авай, юкьванди тир. Ахпа гачал кӀула фекьидин мейитни аваз юкьван папан ракӀарихъ фена... Ф. Савдагардин папанни фекьидин кьиса. Зи вилик юкьван яшарин, кьил саки лацу хьанвай кас ацукьнава. Ж. Гь. Руьгьдин, рикӀерин къелечи.
* юкьван асирар \[виш йисар \] сущ. вад виш лагьай йисарилай цӀувад лагьай виш йисаралди авай девир. Гьайиф хьи, лап къадим заманайрани, юкьван виш йисарани, чи йикъарани жегьил несилдиз тербия гунин карда хизандин, диде-бубайрин роль инкар авунал машгъул алимарни хьана. К, 1989, 1. ӀӀ.
* юкьван виш йисар кил. юкьван асирар.
* юкьван гьисабралди (гьисабдалди ) нар. я гзаф тушиз, я тӀимил тушиз.
* юкьван лежбер сущ. варлувилиз килигайла, кесибрилай вине, девлетлуйрилай агъада авай лежбер. Кесиб лежберар чи даях ятӀа юкьван лежберарни чи патаз гъиз алахъун лазим я. А. И. Самур. 2003 - йисан нетижайриз килигна, республикадин амай дагълух районрилай тафаватлу яз, Ахцегь районда зегьметчийриз, юкьван гьисабдалди, виридалайни кьакьан мажибар ( 2350 манат пул ) ганва... ЛГ, 2004, 15. VӀӀ.
* юкьван мектеб \[школа\] сущ. юкьван образование гудай мектеб, муьжуьд йисан мектебдилай вуздиз фидалди кӀелдай мектеб. Газетрин редакцийри чпин къвалав литературадин кружокар тешкилуналди, анра юкьван школайрин преподавателрив, партийный, советрин ва маса работникрив лекцияр кӀелиз туналди чи литературадин гележег тир жегьил писателар чӀехи авунин кардик лайихлу пай кутада. К. С. Жегьил шаиррин яратмишунин бязи месэлайрикай. Юкьван школадин аялриз ва хайи халкьдин фольклордал рикӀ алай ксариз теклифзавай махарин и кӀватӀал чеб фадлай печатдиз акъатай ва гила лап кьит хьанвай... ктабрикай менфят къачуна туькӀуьрнавайди я. Гь. Гашаров. Сифте гаф.
* юкьван тар сущ. инсандин ва гьайвандин юкьва мефт аваз, сад-садан гуьгъуьналлай уьнуьгар хьтин кӀарабрин цӀиргъ. РикӀ рекъизва, гуя, вини ккӀал квай булахдин кьайи цин стӀалар, адан юкьван тарцяй агъуз цӀуьтхуьнзава. М. В. Гьарасатдин майдандал. Синоним: кьулан тар.
* юкьван тар хуй! межд. 'кьий, кьирай, амачир гьалдиз атурай' манадин экъуьгъун, Дидеди гай нек гьалал тахьайбур! Зулум къуй кьилел, Хурай тар юкьван, Дуьньядикай пай, рузи атӀайбур! Н. И. Бес я зулумат.