араб, прил. гуьзел, надир. Зи гьалдикай ярдиз хабар авач жал, - Юсуф Зуьлейхадиз ухшар, гуьзел яр. Е. Э. Заз булахдал яр акуна. ☼ Юсуф -мусурманрин кьисадин герой я. Адан тарих Къуръандин 12 суьреда, Библиядин ("Бытие", паюнин 37 - 50) ганва. Тарихдин мана, вири патарихъай сад хьтинди туштӀани, абурухъ умумивал ава. Умуми тарих ихьтинди я. Иаков (Якъуб) пайгьамбардиз Иосиф (Юсиф- Юсуф) тӀвар алай гада хьана. Ам вичин стхайрилай гьам хъсан къилихралди, гьам гзаф гуьрчегвилелди, гьамни дерин акьулдалди тафаватлу тир. И кар себеб яз, ам Египетдин фиргъаванрин чӀехидаз, Патифараз, такӀан тир. Стхайри ам маса гана. Патифара кӀвале Юсуфа гъил хкӀур гьар са кардин хийирлу нетижаяр акурла, кӀвалин иесиди адакай еке ихтибарлу кас авуна. Юсуфан гуьрчегвилел ашукь жеда Патифаран паб, Зулейха, амма Юсуфа вичин иесидиз хиянатвал авунач, папа, и кардай Юсифал буьгьтенар вегьена, гъуьлуьв ам дустагъда тваз тазва. Дустагъдани Юсуф вичин къенивили хуьзва, ам анай акъатзава ва яргъал ва марагълу уьмуьрда 110 йисан яшда аваз кьена. Библиядани Къуръанда авай и агьвалатди кьиблепатан эдебиятда са хейлин эсерар арадиз гьана ва абура, Патифар кьейила, Юсуф адан паб Зулейхадал эвленмиш хьана лугьузва. Библияда Юсуф Патифаран руш Асенефал эвленмиш хьана лугьуз кхьизва (Бытие, гл. 4\], 50). Гьам хашпересрин, гьам мусурман эдебиятда Иосиф-Юсиф-Юсуф гафунихъ пуд мана хьана: 1) Иаков- Якъуб пайгьамбардин гада; 2) гуьрчег инсан, гуьрчегди; 3) гуьрчег, гуьзел.