араб, прил. 1) са нив-квев ятӀани са тайин лишанрив, хесетрив кьадай. АтӀлас, дере хупӀ хас я ваз... Е. Э. Вун хвашгелди, сафагелди... Гьар са халкьдихъ кьетӀен адетар ава. Лезгийрихъни хъсан, къени адетар авачиз туш, - зегьметдал рикӀ хьун, мердвал, гаф чинал лугьун, кьуьлун гзаф кӀан хьун, нефс тахьун ва масабур чаз хас къилихар я. "Самур" газ., 2002, 21 XӀ. Хуьрерани. вахтуниз хас дегишвилер гьатиз башламишна. ЛГ, 2004, 28.ӀӀ.... дишегьли, вични нянин вахтунда, залпанд алатай хвар хьиз, гьаргьар ацалтна хъуьрез, чара итимрин юкьва хьун - бубайрин адетриз хас лишан туш. А. Фет, Проза жанлуди хьайила. 2) тайин са чкада авай, машгьур тир. Туьркиядиз, Пакистандиз, Индиядиз хас Д-6 жуьредин вирус малум хьана. Чи уьлкведа виликдай и вирус гьалтзавайди тушир. ЛГ, 2004, 26. VӀӀ.
* хас тӀвар сущ. сад хьтинбур (инсанар, чилер, хуьрер, затӀар) сад масадавай чара авун патал гудай тӀвар. Эгер са чкадин хас тӀвар кьве гафуникай ибарат тирди яз, абрукай гьар са гаф хас тӀвар яз хьайитӀа, абур кьведни ( арада дефис аваз ) чӀехи гьарфунилай башламишна кхьида. Месела: Вини-Макьар, Бурши-Макьар, Агъа-Макьар, Шама-Кучун ва мсб. Лезги литературный чӀалан орфографический къайдайрин свод. ТуькӀуьрайбур: Гаджиев М., Алкадарский А. К. -Махачкала, 1938. Вири хас тӀварар чӀехи гьарфунилай кхьида: 1. ТӀварар, бубадин тӀварар ва фамилияр. Месела: СтӀал Сулейман. 2. Географиядин тӀварар: уьлквейрин, шегьеррин, хуьрерин, вацӀарин, дагъларин, гьуьлерин ва мсб. Месела: Европа, Украина, Урал, Кьурагь, Самур, Москва ва мсб. 3. Гьайванрин лакӀабар. Месела: Кьашкьа, Рагъвац ва мсб. М. М. Гь. Р. И. Гь., У. А. М. ЛЧЮС.