прил. 1) анардин тӀям авай. Аквадай гьалда, дигмиш тахьанвай хват гзаф цуру я, руша ам чин чӀурна хьиз жакьвазва. М. А. Гьарасатдин майдандал. Синоним: турши 2) такӀанвал авай. Гада институтдай акъудайдалай кьулухъ, абурун араяр цуру хьанва. Р. Синонимар: турши, къайи.
* фири некӀеди кайида цуру некӀедизни уф гуда.
* цуру авун гл., ни вуч цуру тӀям авай гьалдиз гъун.
* цуру нек сущ.; гъери хкуднавай, вичихъни цуру тӀям агалтнавай нек. Вира халкьди шалам-дулах ядайла, Шаирди бес алукӀдани шиблетар, Хуьруьнвийри са цуру нек хъвадайла, Шаирди вирт хъвадани бес, иблисар?! А. С. Шаламар ва чуьнгуьр. Агъуз хьана душманд вилик, недалди аш кишмиш галай, Тик акъвазна цуру нек хьун, дуьз лагь кӀан гъикьван иер я; З. Р. Иер.
* цуру хьун гл. 1) цуру тӀям авай гьалдиз атун. 2) куьч., вуж кефияр пис гьалдиз атун. 3) куьч. кьве касдин араяр (алакъаяр) чӀур хьун.