сущ.; -и, -а; -ар, -ри, -ра тӀуьр затӀ иливардай орган. Аждагьан кьуна, гапур адан руфуниз сухна. Ф. КӀеви ахвар. И гьайванар, далуйриз жанг акъатна, чувалархьиз ацӀайруфунар са патал авуна, акӀана, къвал-къвалаваз, ацукьнавай А. Ф. Лянет. Руфуниз кӀанзавайди техилдин са кап фуни гъеридин са кӀус я. А. А. Лезгияр.
* къуьлуьн фаз ракьун руфун кӀанда, кӀвачин руфун.
* руфун атун гл., низ, нел яцӀу хьун. Гатфарихъ рагъ элкъведай вахтунда Селванадал еинелай малум жедай руфун атанвай. А. А. Пад хьайи рагъ.
* руфунар авадарун гл., нин кьин, чан хкудун. \[ Жарият\]. Вавай, чан хва, садан хьайитӀани руфунар авадариз хьаначни? Ж. Эфендиев. Азадвилин рекье.
* руфун аватун гл., нин гзаф залан кӀвалахуникди руфуна авай органрикай сад руфунин - бушлухдай акъатна хамуник аватун.
* руфун вилик кутун (гьалдун нугъ. ) гл., ни тӀуьнал гзаф рикӀ хьун. Ваз чидач, зи къуншийри руфун вилик гьалднава. Л. Н. Ругудар.
* руфун вегьена ацукьун гл., вуж тӀуьнал гзаф рикӀ алаз ацукьун. Абасанни Алидин ихтилатар яргъал физвай, яваш-яваш хурушум мукьвал жезвай. Руфунар вегьена ацукьнавай кьве лутудин сивел цӀаран яд кьвезвай. Къ. Къ. ЧӀурун паб.
* руфун кал сущ. тӀуьнал гзаф рикӀ алайди. Синоним: хук.
* руфун калвал сущ. тӀуьнал гзаф рикӀ алай гьал.
* руфун клар нугъ., сущ. сад-садав кьадай кьве тереф. Хуьруьгарни Кьакар сад-садахъ галаз туькӀвейбур я. Чи хуьрериз гьавайда руфунин клар лугьузвай туш, яни чун гьамиша сад-садав кьур, туькӀвей хуьрер я. О. Гьуьсейнов. Хуьруьн тарих.
* руфун метӀерал алай прил.,; вуж нефс къати, тӀуьнал-хъунал рикӀ алай. - Заз чидайди вири элдизни чида. Вирида, тек са Сурхаян мукьва-кьили ксар квачиз, ахпа ада маса къачунвай руфун метӀерал алай гьакимар квачиз, гьа вирида ваз а гъуьлягъ физ экъечӀзавай, мурдар тӀеквенар лугьуда. Къ. М. Дагъларин деринрин булахар.
* руфун цик кутун гл., ни. тӀямлу ва булвилелди жедай тӀуьн-хъуник умуд кутуна акъвазун, гуьзлемишун. \[Бедевхан\]. - ТӀуьрди мал я, Урзум, амайди - дерт... Ша, ша нянриз чна са дем ийин! \[Урзум\]. - Вуна гуьзлемиша! Жуван руфун атӀа къубудин це туна хъуьтуьл ая, Бедевхан, за ам. къе «тӀямлу няметрив» ацӀурда'. Къ. М. Рушарин багъ.
* руфунал залан авун гл., ни-куь руфуна аял авай гьалдиз гъун. Гьа икӀ, Лисамни Асми сад садал ашукь яз дуланмиш хьана. Адет тирвал, ашукьвал муьгьуьббатдиз элкъвена, муьгьуьббатдини Асми руфунал залан авуна. А. А. Пад хьайи рагъ. Синоним: бугъаз хьун.
* руфунал залан хьун гл., вуж руфуна аял авай гьалдиз атун.
* руфуниз такӀанди тек са чукӀул я мисал 'руфуни вуч хьайитӀани иливарла, вуч тӀуьртӀани жеда' манадин ибара.
* руфуник ял акатун гл., нин руфун дакӀун. Руфуник ял акатнавайла, иферар, кьурурнавай шивитар ва лавровый пешер ( вири сад хьтин паяр ) кофемолкада регъвена вири сад-садак какадарна, чайдин тӀурунин са кьатӀа авайди ишлемишда. ЛГ, 2004, 15. VӀӀ.