прил. 1) са вуч ятӀани атӀудай мурз алай, Адан хци сараризни гужуналди муьтӀуьгъ хьайи чуьхвердай акъатна мецихъ галукьайди сивер ртӀадай туькьуьлвал хьана. А, Исм. Алукьдай ахвар. 2) куьч. лап къати, дурумлу. Гьуьрметлу дустунин вахтсуз чи арадай акъатна хиянатдин къурбанд хьунухь къуй, халкьарин азадвал патал тухузвай хци женгерин, пайдах хьуй! - лагьана ада. А. И. Самур. – Суь-уь-уьс! - садлагьана лап зегьле фидай кьван хци ван акъатна. Б. Гь. Заз эвера. .* хци авун гл. ни вуч са вуч ятӀани (векь, парча, кек, кӀарас) атӀудай алатдин (дергесдин, мукӀратӀдин, нажахдин) мурз генани кьелечӀарун. - Акъваз, дустар, дергесар Хци авун герек я, А. С. Хцихъ галаз ихтилат. Мукалар, дергесар хци ийизвай, цуьруьгъуьлдиз ва ругунриз сарар хъиязавай, арабада гиг, викӀина кӀар твазвай, алеррик къам кутазвай. З. Э. Муькъвел гелер.
* хци вилер сущ. хъсандиз аквадай вилер. КӀеви я чи рикӀер, Мягькем я чи гъилер, Йигин я чи вилер, Хци я чи кӀвачер, Хци я чи вилер. М. М. Гь. Чи мани. Бирдан дереда 1 са ван гьатна. ВацӀун ван тушир. Белки цава самолет аватӀа? Ваъ, михьи цавалайни Насрулагъан хци вилериз затӀни акунач. А. Исм. Алукьдай ахвар.
* хци хьун вуч хци гьалдиз атун. Жегьилдин вилер хци жеда, агьилдин - рикӀ. З. Къ. Чардахдик межлис гур хьана. Хъуьруьнар къалин, ванер мадни хци жезвай. А. Исм. Алукьдай ахвар.