араб, сущ.; -ди, -да; -ар, -ри, -ра са вуч ятӀани (уьмуьр, рехъ ва мсб) куьтягь жедай вахт. Эхир кесиб хьайила, гьамни хьана пис. Е. Э. Герек туш. Шумудни са бейниван Ава эхир фагьумиз. Е. Э. Дуьньядиз. Зун хьиз, эхир кана кабаб хьайиди... атуй. Е. Э. Веси. Гьар са шейиниз вичин эхир ава. З. Гь. Ахварай авудай аваз. Виридахъ вичин, эвел хьиз, эхирни ава. Амма, аквадай гьалда, я эвел, я эхир авачирди са Иман я. Иман мидаим я. М. В. Гьарасатдин майдандал.
* эхир нефес хьун гл., нин кечмиш хьун. Дустариз лагь: гъафил тахьуй ахвара, Эхир нефес жезава, - лагь, -мукьвара. Е. Э. Дустариз. Синоним: кьин.
* эхир пехир хьун гл., нин-куьн эхир чӀуру гьалдиз атун. Чи амалдиз вил вегьейла, чи лап эхир пехир хьанва. Е. Э. Алкьвадар Гьажи Абдуллагь эфенди кьейила. А чӀавуз, шак алач, милли чӀаларалди акъудзавай газетрин эхир пехир жеда. ЛГ, 2004, 17.ӀӀ. Гьатта сатирадин шииррани шаирди намуслу зегьметдин тарифзава, намуссуз зегьметдин эхир-пехир жедайди лугьузва, саймаз гьалда чӀугвазвай зегьметдал ам хъуьрезва. А. Гьажимурадов. Зегьметдин ашукь. Тапархъандин, квез чир хъухь, эхир жедайди пехир. СА. Рекьерин дафтардай.
* эхир хьун гл., нин куьтягь хьун. Фагьумна за, дуьнья, ви гьал, аквазва ви эхир хьанва. Е. Э. Алкьвадар Гьажи Абдуллагь эфенди кьейила.
* эхир жери кар сущ. кьилиз акъатдай кар. Таб имир на, Эхир жери кар ятӀа... Е. Э. Гуьзел.
* эхир эцигун гл., ни квел тикрар техжедай, давам техжедай гьалдиз гъун. Селим адан рикӀикай хкатзавачир; белки, къайи рахунри абрун бахтсуз муьгьуьббатдал эхир эцигдай. А. А. Умуд. Кьилинди, адалай кьулу-кьулухъ финал эхир эцигна хьиз, район дерин кризисдин гьаларай акъудиз алакьна. ЛГ, 2004, 15. VӀӀ.