сущ.; -ди, -да; -яр, -йри, -йра 1) аялдиз багъри итим, ам аладайди. Гужуналди зун бубади гайитӀа, Ахпа ам я эхир дуван, Невжеван. Е. Э. Серминазахъ галаз суьгьбет. Бахтавар хьуй бубадин югъ, Акьуллу велед хьайитӀа... С. С. Веледдиз. Тагьиран буба Алим, гзаф кесибар хьиз, мухан савни шихинин шалвар патал рекьерани убайра гьатнавай. инсан тир. А. С. Хуьруьг Тагьир ан эсерар. 2) аялдиз вичин дидедин ва я бубадин буба. 3) яшар хьанвай инсан. Гьар са буба гачал хан я дуьньяда. Е. Э. Дуьнья гургьагур. Дашдемиран гафарихъ яб акалай Серкер бубади адаз икӀ лагьана... Н. А. Шагьмар. -Ви тӀвар вуж я, хтул? - кьуьзуьда хиялрик кваз жузуна. - Сефиюллагь я, буба, - итимди кьил рахазвайдахъ элкъуьрна. Ж. Гь. ИкӀ ва акӀ тушиз. 4) гзафвилин кьадардин формада алатай аямрин несилар, итимар. Ам акурбуру, бубайри - "МуркӀадин кьелечӀ чкадилай хада" - лагьай гафар дуьзбур я лугьудай. А. И. Самур. Бубайри лагьайвал, кьуьгьвер - къуьртӀ, яр - гатфар. Гь. Къ. Четин бахт; 5) сифтегьан инсанар аладай кас. Буба Адам халкь авур Сад Иллагьи. Е. Э. Иллагьи. 6) жува гьуьрмет ийизвай ва жувалай яшариз чӀехи кас. Расул Гьамзат, чуьнгуьр вахце Зав Сулейман бубадин. М. Б. Сулейманан чуьнгуьр. 6) ( чӀехи гьарфуналди - Б ) эркекдин хас тӀвар - Буба. Буба Гьажикъулиев къенин прозаик я ва ада лезги литературада кьетӀен чка кьазва. Р.
* буба ваз къурбанд < хьуй > ! межд. гуьзлемиш тавунвай са кар арадиз атанвайдакай ихтилат башламишдайла, жуван мягьтелвал къалурдай ибара. Буба ваз къурбанд, зи ратар сивихъ атана. Низ чида шумуда зи винелай чамарарнатӀа! Т. А. Мехъер куьтягь тахьанмаз.
* бубадиз рагьмет < хьуй > ! межд. ихтилатчидин гафарал рази ва шад тирда къалурдай ибара. - Жегьилар рази хьайитӀа, чунни рази я., - Эхь, эхь, бубадиз рагьмет. А. Р., Я. Я. Хендедадин мехъер. [ ЦӀарг- Дар баде ]. Куь тӀалабунар кьиле тухуз чун гьазур я! [Наг-Дамур]. Бубадиз рагьмет! Заз аквазвайвал, куьн залайни фейи кар чидайбур я. Ф. Б. Филиал.
* бубадиз рагьмет хьайиди обр. 1) рахазвайдахъ галаз вичиз хъсан гьиссер авайди къалурдай обращение. [ Эфенди ]. Бубадиз рагьмет хьайиди, вун закай архайин хьухь. Гь. Гь. Колхоз. 2) рахазвайда лагьай гафунал рази тирди къалурдай гаф. - Бубадиз рагьмет, - лагьана давам хъувуна вичин суьгьбет Алиди, - эхир а багьа пурар Исакъ лугьудай стӀалвиди, вичин гьаятдин пата кӀватӀнавай фитерик кутуна, чуьнуьхналда. С. Ярагъви ашукь Уьзден.
* бубадин бармак хцив кьадач мисал бубадин ва я лап мукьвадан амалдалди уьмуьр тухуз жедач.
* бубайрин девирар сущ. фад алатай вахтар. Бубайрин девиррилай башламишна, Бакуда ва Азер- байджанда... чи дагълух лезги районрай атанвай гзаф инсанар яшамиш жезва. ЛГ, 1992, 23.ӀӀ.
* ата-буба, чӀехи буба.